Pune: जमिनीसाठी एकमेकांच्या जिवावर उठले, पुण्यात दोन गटात तुंबळ हाणामारी; VIDEO व्हायरल

पुणे जिल्ह्यातील खेड तालुका पुन्हा एकदा जमिनीच्या वादामुळे दोन गटात तुंबळ हाणामारी झाला. जमिनीचा ताबा घेण्यासाठी आलेल्या महिलांचा गट आणि स्थानिक तरुणांमध्ये फ्री-स्टाईल हाणामारी झाली. खेड तालुक्यातील वाफगाव येथे ही घटना घडली. जमिनीचा ताबा घेण्यासाठी बाहेरून काही महिला आल्या होत्या. मात्र स्थानिकांनी त्यांना विरोध करताच वाद चिघळला आणि काही क्षणातच हा वाद थेट हाणामारीत परिवर्तित झाला. महिलांसह तरुणांमध्ये जोरदार ढकलाढकली, मारामारी आणि गोंधळ उडाल्याने परिसरात तणावपूर्ण परिस्थिती निर्माण झाली.

या संपूर्ण घटनेचे व्हिडिओ समोर आले असून त्यात उघडपणे सुरू असलेली हाणामारी स्पष्ट दिसत आहे. अधिक धक्कादायक बाब म्हणजे पोलिस घटनास्थळी पोहोचूनही परिस्थिती नियंत्रणात आणण्यासाठी तात्काळ कठोर कारवाई झाल्याचे दिसून आले नाही, असा आरोप स्थानिकांनी केला आहे. जमिनीच्या ताब्यासाठी अशाप्रकारे महिलांचा वापर करून उघडपणे राडे घडवले जात असल्याने कायदा-सुव्यवस्थेचा प्रश्न गंभीर बनला असून सामान्य नागरिकांमध्ये चिंतेचे वातावरण पसरले आहे.