Marathwada Rain : परभणीत पुराच्या पाण्यात एसटी बस गेली वाहून, धडकी भरवणारा VIDEO समोर

राजेश काटकर, साम टीव्ही परभणी

परभणी : गेल्या 24 तासांपासून परभणी जिल्ह्यात मुसळधार पाऊस सुरु आहे. पावसामुळे नद्या-नाले दुथडी भरून वाहत असून अनेक भागात पूरस्थिती निर्माण झाली आहे. अशातच मानवत तालुक्यात एक धक्कादायक घटना घडली आहे. एसटी महामंडळाची बस पुराच्या पाण्यात वाहून गेली आहे. या थरारक घटनेचा व्हिडीओ समोर आलाय.

मिळालेल्या माहितीनुसार, परभणीच्या मानवत तालुक्यातील वझुर (बु.) येथे सोमवारी पहाटे चारच्या सुमारास ही घटना घडली. वझुर गावात पाथरी आगाराची बस मुक्कामी होती. बसमध्ये चालक सुदाम दहे आणि वाहक शिवाजी देशमुख झोपलेले होते. बसमध्ये पाणी शिरल्याचा आवाज येत असल्याचे लक्षात आल्यावर त्यांनी बस चालू करण्याचा प्रयत्न केला.

परंतु बसला चालू होऊन ब्रेकच्या हवेची टाकी भरण्यास वेळ लागला. तोपर्यन्त एक मोठा पाण्याचा लोंढा आला आणि बसने जागा सोडून वाहू लागली. प्रसंगावधान राखून चालक व वाहक यांनी वाहनातून काढता पाय घेतला आणि जीव वाचवला. दोघेही वेळीच बसमधून बाहेर पडल्याने मोठा अनर्थ टळला. दरम्यान, बस 100 मीटर पेक्षा दूर पुराच्या पाण्यात वाहून गेली आणि तिथेच अडकली.