Mumbai-Ratnagiri Highway: गुड न्यूज! मुंबईवरून रत्नागिरीला जा फक्त ४ तासांत, काय आहे हायस्पीड ग्रीनफिल्ड महामार्ग? VIDEO

कोकणवासीयांसाठी एक आनंदाची बातमी आहे. रत्नागिरी ते मुंबई हे अंतर आता फक्त चार तासांत पार होणार आहे. केंद्र सरकारने मंजूर केलेला हायस्पीड ग्रीनफिल्ड महामार्ग हा कोकणासाठी खऱ्या अर्थाने गेम चेंजर ठरणार आहे.

३७६ किमी लांबीचा आणि १०० मीटर रुंदीचा हा महामार्ग ६ मार्गिकांसह तयार होणार आहे. यासाठी ६८,७२० कोटी रुपयांचा खर्च अपेक्षित असून, सुमारे ३७९२ हेक्टर जमीन संपादित केली जाणार आहे.

या महामार्गाचे वैशिष्ट्य म्हणजे त्यावरील ४१ बोगदे, ५१ मोठे पूल आणि ६८ ओव्हरपास, जे कोकणातील निसर्गसंपन्न आणि डोंगराळ भागातून सहज मार्गक्रमणास मदत करतील.

महामार्गाची प्रस्तावित मार्गरेषा अशी असेल:

अलिबाग-शहाबाद-रोहा, माणगाव-मेढेगाव, मंडणगड-दापोली-गुहागर-गणपतीपुळे, राजापूर-भालवली-देवगड, मालवण-कुडाळ-सावंतवाडी या प्रमुख कोकणी शहरांना जोडणारा हा महामार्ग कोकणच्या विकासाला गती देणारा ठरेल.

याशिवाय, सागरी महामार्ग, मुंबई-गोवा महामार्ग आणि ग्रीनफिल्ड महामार्ग हे एकमेकांना जोडले जाणार असल्यामुळे वाहतूक व्यवस्थेत आमूलाग्र बदल अपेक्षित आहे. हा महामार्ग कोकणच्या आर्थिक, पर्यटन आणि सामाजिक विकासाला नवे वळण देणारा ठरेल, यात शंका नाही.