म्हाडाचा मोठा निर्णय; मुंबईतील १२२१ घरांच्या किमतीत केली इतकी कपात

संजय गडदे, साम टीव्ही

म्हाडा मंडळाने २०२६ च्या घरसोडतीत नागरिकांना मोठा दिलासा दिलाय. मुंबईच्या विक्रोळी पूर्व येथील कन्नमवार नगर प्रकल्पातील १२२१ घरांच्या किमतीत ७.५ टक्के कपात करण्यात आलीये. म्हाडाने मुंबईतील विविध प्रकल्पांमधील एकूण २६४० घरांसाठी संगणकीय सोडत जाहीर केलीये. त्यामध्ये विक्रोळीतील या प्रकल्पाचा समावेश आहे.

कोणत्या घरांची किंमती केली कपात?

संकेत क्रमांक ५३८ अंतर्गत बिल्डिंग क्रमांक २ अ आणि ब मधील ४८० घरांची जुनी किंमत १ कोटी ४५ लाख ५८ हजार ते १ कोटी ४७ लाख ९७ हजार रुपये होती. आता ती कमी होऊन १ कोटी ३४ लाख ६६ हजार ते १ कोटी ३६ लाख ८८ हजार रुपये झाली आहे.

तर संकेत क्रमांक ५३९ अंतर्गत बिल्डिंग क्रमांक ३ अ, ब, क मधील ७४१ घरांची जुनी किंमत १ कोटी ४५ लाख ७४ हजार ते १ कोटी ४८ लाख १४ हजार रुपये होती. आता ती कमी होऊन १ कोटी ३४ लाख ८१ हजार ते १ कोटी ३७ लाख ३ हजार रुपये झाली आहे.

सर्व घरांसोबत प्रत्येकी एक पार्किंग मोफत दिले जाणार आहे. या सोडतीसाठी ऑनलाईन अर्ज प्रक्रिया सुरू असून अर्ज करण्याची अंतिम मुदत १४ मे २०२६ रोजी रात्री ११.५९ वाजेपर्यंत आहे. तर संगणकीय सोडत ५ जून रोजी काढण्यात येणार आहे. अधिकाधिक नागरिकांनी या संधीचा लाभ घ्यावा, असे आवाहन म्हाडा मुंबई मंडळाने केलंय.