Mumbai Mayor Race : मुंबईच्या महापौरपदासाठी शर्यत वाढली, या ६ महिलांची नावं चर्चेत

मुंबई महापालिकेची निवडणूक ठाकरे आणि भाजप, शिंदेंसाठी प्रतिष्ठेची झाली होती. मुंबईकरांनी भाजप-शिंदेसेना युतीच्या बाजूने कौल दिला. भाजप सर्वात मोठा पक्ष ठरला. त्यांचे ८९ उमेदवार जिंकले. मुंबईचा महापौर कोण होणार अशी चर्चा सुरू झाली आहे. त्यात शिंदेसेनेनं अडीच वर्षांसाठी महापौरपद देण्यात यावे, अशी मागणी केली आहे. वरिष्ठ पातळीवर काय निर्णय होतो याकडं सर्वांचं लक्ष लागलं आहे. त्यात महापौरपदासाठी आरक्षण सोडत जाहीर करण्यात आली आहे. महापौरपद खुला प्रवर्ग महिलांसाठी राखीव झाला आहे. त्यामुळं मुंबईच्या महापौरपदी महिला विराजमान होणार हे निश्चित झालं आहे.

महापौरपदासाठी ६ महिला नगरसेवकांची नावं आघाडीवर आहेत. राजश्री शिरवडकर, अलका केरकर, रितू तावडे, हर्षिता नार्वेकरांची नावं चर्चेत आहेत. शीतल गंभीर आणि आशा मराठे या दोघींची नावेही आघाडीवर आहेत. शिरवडकर आणि केरकर या दोन्ही नवनिर्वाचित नगरसेविका या पदासाठी आग्रही असल्याचे सांगण्यात येते. आता भाजपचे वरिष्ठ नेते कुणाच्या नावावर शिक्कामोर्तब करतात याकडे सगळ्यांचे लक्ष लागले आहे.