Maharashtra Mango: अबब, मियाझाकी ! एक आंबा फक्त १० हजार रुपयांना, ते पण आपल्या महाराष्ट्रात, VIDEO

आंब्याचा हंगाम सुरू झाला असून, बाजारात हापूस, दसेरी, केसर, गावरान यांसारखे विविध प्रकारचे आंबे उपलब्ध आहेत. मात्र, सध्या नांदेडमध्ये एका खास आंब्याची जोरदार चर्चा सुरू आहे. आणि त्याचे कारणही तसेच खास आहे या आंब्याची किंमत ऐकून तुम्ही थक्क व्हाल

हा आंबा म्हणजे "मियाझाकी" जो जगातील सर्वात महागडा आंबा म्हणून ओळखला जातो. एका मियाझाकी आंब्याची किंमत तब्बल 10 हजार रुपये असून, त्याच्या चव आणि गुणधर्मांमुळे तो विशेष महत्त्वाचा मानला जातो.

नांदेड जिल्ह्यातील भोकर तालुक्यातील भोसी गावातील तरुण शेतकरी नंदकिशोर गायकवाड यांनी आपल्या खडकाळ माळरानावर मियाझाकी आंब्याचा यशस्वी प्रयोग केला आहे. दोन वर्षांपूर्वी त्यांनी फिलिपाईन्स येथून मियाझाकी आंब्याची दहा रोपे मागवली आणि योग्य पद्धतीने लागवड व संगोपन केले. यंदा त्यांच्या झाडांना पहिल्यांदाच आंबे लागले असून, कृषी प्रदर्शनात या आंब्याची विशेष चर्चा झाली.