Vidhan Bhavan Andolan : चड्डी बनियान गँगचा धिक्कार असो, विधान भवनाच्या पायऱ्यांवर विरोधकांची घोषणाबाजी | VIDEO

महाराष्ट्र विधान भवनाच्या पायऱ्यांवर महाविकास आघाडीच्या नेत्यांनी जोरदार आंदोलन करत सरकारविरोधात निषेध व्यक्त केला. काँग्रेस, राष्ट्रवादी काँग्रेस (शरद पवार गट) आणि शिवसेना (उद्धव बाळासाहेब ठाकरे गट) यांचे आमदार आणि नेते मोठ्या संख्येने एकत्र आले होते. विरोधी पक्षनेत्यांच्या नियुक्तीत होत असलेला उशीर, तसेच भ्रष्टाचाराचे आरोप या मुद्द्यांवर त्यांनी सरकारला जाब विचारला आहे. इतकंच नाहीतर महाराष्ट्राची लूट करणाऱ्या चड्डी बनियान गँगचा धिक्कार असो असे फलकही विरोधकांच्या हाती पाहायला मिळाले.

आंदोलनादरम्यान आमदारांनी सरकारविरोधात जोरदार घोषणाबाजी केली आणि तातडीने कारवाईची मागणी केली. संजय गायकवाड आणि मंत्री संजय शिरसाट यांच्या विरोधात हे अंदोलन करण्यात येत असून, सरकारने लोकांच्या प्रश्नांकडे दुर्लक्ष केल्याचा आरोप करत महाविकास आघाडीच्या नेत्यांनी उत्तरदायित्वाची मागणी केली आहे. या आंदोलनामुळे विधान भवन परिसरात काही काळ तणावाचं वातावरण निर्माण झालं होतं. अंदोलनाच्या वेळी नेते जितेंद्र आव्हाड आणि अंबादास दानवे हे देखील उपस्थित होते.