Maharashtra Politics : पालिका निवडणुकांआधीच महाराष्ट्राच्या राजकारणात भूकंप?

राज्यातील मिनी विधानसभा म्हणून ओळखल्या जाणाऱ्या महापालिका निवडणुकांसह स्थानिक स्वराज्य संस्थांच्या निवडणुका होऊ घातल्या आहेत. तशी तयारी प्रशासकीय पातळीवर आणि प्रमुख राजकीय पक्षांकडून सुरू झाली आहे. मात्र, या निवडणुकांआधीच राज्याच्या राजकारणात मोठा भूंकप होईल, असा अंदाज व्यक्त करण्यात येत आहे. भाजप, शिवसेनासारख्या प्रमुख पक्षांच्या नेत्यांकडून पालिका निवडणुका स्वबळावर लढण्याची भाषा केली जात आहे. आता एकनाथ शिंदे यांच्या शिवसेना नेत्यानं तसे संकेत दिले आहेत.

तुम्ही आमच्यासोबत आलात तर युती म्हणून निवडणूक लढवू; नाहीतर तुम्ही स्वबळाची भाषा केली तर आम्ही पण स्वतंत्रपणे भगवा फडकावण्यासाठी सज्ज आहोत, असं सांगतानाच खासदार नरेश म्हस्के यांनी भाजपला अप्रत्यक्ष इशारा दिला आहे. युवा सेनेच्या जाहीर मेळाव्यात त्यांनी ही भूमिका मांडली आहे. त्यामुळं किमान नवी मुंबईत महायुती फुटणार, अशी चिन्हे दिसत आहेत.