Ajit Pawar: 'खरी शिवसेना ठाकरेंची', अजित पवारांचा जुना VIDEO पुन्हा चर्चेत

राज्यातील महानगर पालिका निवडणुकीदरम्यान राजकीय वातावरण तापण्यास सुरूवात झाली आहे. आज उमेदवारी अर्ज मागे घेण्याचा शेवटचा दिवस आहे. बंडखोरांनी अर्ज माघारी घ्यावा यासाठी प्रयत्न सुरू आहेत. अशातच शिवसेना ठाकरे गटाकडून उपमुख्यमंत्री अजित पवार यांचा एक जुना व्हिडीओ पोस्ट केला आहे. यामध्ये अजित पवार यांनी शिवसेनेचा इतिहास सांगितला. त्यांनी खरी शिवसेना उद्धव ठाकरे यांची कशी याबाबत भाष्य या व्हिडीओमध्ये केले आहे.

'प्रबोधनकार ठाकरे यांनी शिवसेना नाव दिले. त्यांनी शिवसेना वाढवली. मराठी माणसांना ताकद देण्यासाठी त्यांनी शिवसेना वाढवली. त्या मराठी माणसाने साध्या साध्या कार्यकर्त्याला आमदार केलं, खासदार केलं, मंत्री केलं, मुख्यमंत्री केलं. मनोहर जोशी आणि नारायण राणे यांचा सुरूवातीचा काळ आठवा. यांना बाळासाहेबांनी मोठं केलं.', असे अजित पवार व्हिडीओत बोलताना दिसत आहेत.