"माझी आई आता दिसणार नाही..." – चिमुकलीची आर्त हाक, हृदय पिळवटून टाकणारा VIDEO

संदीप भोसले, साम टीव्ही

लातूर : औसा बायपास मार्गावर झालेल्या भीषण अपघातात एका महिलेचा मृत्यू झाला आहे. भरधाव कारने रस्त्याच्या कडेला चालत असलेल्या संगिता गणथोडे (वय 34) यांना जोरदार धडक दिली होती. हा अपघात कार चालक मध्यधुंद अवस्थेत असताना झाला असल्याची माहिती समोर आली आहे.

सुमारे महिनाभरापूर्वी झालेल्या या अपघातानंतर संगिताबाईंच्यावर उपचार सुरू होते. मात्र उपचारादरम्यान त्यांचा मृत्यू झाला. त्यांच्या मागे लहान मुलगा व मुलगी असा परिवार आहे. आईच्या मृत्यूमुळे घरावर दुःखाचा डोंगर कोसळला असून चिमुकलीने रडत रडत व्यक्त केलेली वेदना "माझी आई आता दिसणार नाही..." हृदय पिळवटून टाकणारी होती.

या प्रकरणी आरोपी कारचालक डॉ. महेश पाटील याने अपघातानंतर घटनास्थळावरून पळ काढला होता. नातेवाईकांनी त्याच्यावर 'हिट अँड रन' प्रकरण नोंदवण्याची मागणी केली आहे. मृत महिलेच्या पतीने आरोप केला आहे की, आरोपी डॉक्टर पैसे व प्रभावाच्या बळावर अटक टाळत असून कुटुंबाला धमक्या देत आहे. या अपघातामुळे दोन निरागस मुलांनी आपली आई गमावली आहे. गंथोडे कुटुंबाने प्रशासन व पोलिसांकडे न्याय मिळवून द्यावा, तसेच आरोपीवर कठोर कारवाई करावी, अशी मागणी केली आहे.