Ladki Bahin Yojana : लाडकी बहीण रुसली! दिवाळी तोंडावर, पण ₹ १५०० मिळेनात!

सागर निकवाडे, नंदूरबार | साम टीव्ही

महिन्याला १५०० रुपये बँक खात्यात जमा होत असल्यानं खूश असलेल्या लाडक्या बहिणी आता सरकारवर रुसल्या आहेत. लाडकी बहीण योजनेचा सप्टेंबर महिन्याचा हप्ता अद्याप बँक खात्यात जमा झालेला नाही. आता ऑक्टोबर महिन्याचा पहिला आठवडाही उलटून गेला आहे. मात्र, सरकारनं अद्याप बँक खात्यांमध्ये १५०० रुपये जमा केलेले नाहीत. त्यामुळे महिला वर्गात तीव्र नाराजी आहे.

दिवाळी तोंडावर आली आहे. अवघे काही दिवसच उरले आहेत. सप्टेंबर आणि ऑक्टोबर अशा दोन्ही महिन्यांचे एकूण तीन हजार रुपये बँक खात्यात जमा करून सरकार महिलांची दिवाळी गोड करणार अशी अपेक्षा होती. मात्र, सप्टेंबर महिना संपला आता ऑक्टोबर सुरू झाला आहे. पण सप्टेंबरचाच हप्ता अद्याप जमा झालेला नाही. त्यामुळे नाराजी असून, सरकारने लवकरात लवकर खात्यात पैसे जमा करून दिवाळी गोड करावी, अशी मागणी महिला वर्गातून होत आहे.

लाडकी बहीण योजनेचे दोन महिन्यांचे हप्ते अद्याप जमा झालेले नाहीत. दिवाळी जवळ आली आहे. तरी अद्याप पैसे खात्यात जमा झालेले नाहीत. लवकरच दोन महिन्यांचे पैसे जमा करावेत, अशी मागणी लाभार्थी महिला सेवीबाई पावरा यांनी केली. सध्या ई केवायसी करायला लावली आहे. ती होत नाही. ओटीपी क्रमांक येत नसल्याने ई केवायसी प्रक्रिया पूर्ण होत नाही. दिवाळी तोंडावर आहे, तर त्याआधी दोन महिन्यांचे पैसे बँक खात्यात जमा करावी, अशी मागणीही त्यांनी केली.