Kolhapur News Update : कॉंग्रेसला आणखी एक धक्का; कोल्हापूर उत्तरच्या आमदार जयश्री जाधवांचा शिंदे गटात प्रवेश

विधानसभा निवडणुकीच्या रणसंग्रामात एकनाथ शिंदे यांनी कॉंग्रेसला कोल्हापूर उत्तरमधून मोठा धक्का दिला आहे. कॉंग्रेसच्या विद्यमान आमदार जयश्री जाधव यांनी शिवसेना शिंदे गटात प्रवेश केला आहे. कॉंग्रेसने विधानसभेला तिकीट नाकारल्याने त्या नाराज होत्या. त्यांनंतर त्यांनी आज मुख्यमंत्री एकनाथ शिंदे यांच्या उपस्थितीत शिंदे गटात प्रवेश केला आहे.

विधानसभा निवडणुकीच्या अनुषंगाने राज्यात सध्या राजकीय घडामोडींना वेग आला आहे. प्रत्येक पक्षातील नाराजांकडून सध्या बंडखोरी केली जात आहे. तर काही ठिकाणी तिकीट न मिळाल्याने पक्ष बदल देखील केला जात आहे. त्यामुळे विधानसभा निवडणुकीत नेमकं कोणाचं पारडं जड होईल याचा अंदाज बांधणं अवघड जात आहे. अशातच आज महायुतीकडून कॉंग्रेसला धक्का बसला आहे. एकीकडे कॉंग्रेसचे ज्येष्ठ नेते रवी राजा यांनी आज मुंबईत भाजपमध्ये प्रवेश केला आहे. तर दुसरीकडे कोल्हापूर उत्तरमध्ये कॉंग्रेसच्या विद्यमान आमदार जयश्री जाधव यांनी एकनाथ शिंदे यांच्या शिवसेनेत पावेश केला आहे. त्यामुळे कोल्हापूर उत्तरमध्ये देखील कॉंग्रेसला विधानसभेला फटका बसणार आहे. कोल्हापूर उत्तरमधून शिंदे गटाकडून राजेश क्षीरसागर हे उमेदवार आहेत. आता जयश्री जाधव यांच्या बंडखोरीमुळे त्यांना विधानसभेत चांगलाच फायदा होणार आहे.

Edited By Rakhi Rajput