Mumbai Dry Day News | मुंबईतील 'ड्राय डे'वर मोठा निर्णय; लोकसभेचा निकालानंतरच दारूविक्री करता येणार

लोकसभा निवडणूक मतमोजणीच्या दिवशी जिल्हाधिकाऱ्यांनी ड्राय डे घोषित केला होता. त्याविरोधात हायकोर्टात याचिका दाखल करण्यात आली होती. या याचिकेवर हायकोर्टानं निर्णय दिला आहे. लोकसभा निवडणुकीचा निकाल लागल्यानंतर दारूविक्री करता येणार आहे.

निकालाच्या दिवशी म्हणजेच ४ जून रोजी मुंबईत ड्राय डेबाबतचा निर्णय मुंबई शहर आणि मुंबई उपनगरच्या जिल्हाधिकाऱ्यांनी घेतला होता. या निर्णयाविरोधात आहार संस्थेने मुंबई हायकोर्टात धाव घेतली होती. संपूर्ण दिवस दुकाने बंद ठेवणे अवास्तव असल्याचा दावा संस्थेने केला होता. त्यावर आज शुक्रवारी सुनावणी झाली. मुंबई हायकोर्टाने आहार संस्थेला मोठा दिलासा दिला. ४ जूनला निकाल जाहीर झाल्यानंतर दुकाने खुली करण्याची मुभा देण्यात आली आहे. त्यामुळे आता ४ तारखेला दारूविक्री करता येणार आहे.