Nashik : नाशिकमध्ये गोदावरीला पूर! सलग ५ व्या दिवशी गंभीर स्थिती |VIDEO

शहरात सलग पाचव्या दिवशी गोदावरी नदीची पूरस्थिती कायम असून पावसाची संततधार सुरूच आहे. गोदावरी नदी ही दुथडि भरुन वाहताना बघायला मिळत आहे. त्यामुळे रामकुंड आणि गोदा घाटाचा परिसर सलग पाचव्या दिवशी पूर्णपणे गोदावरीच्या पुराच्या पाण्याखाली गेलेले आहे. या सततच्या पावसामुळे जिल्ह्यातील एकूण जलसाठा ४३ टक्क्यांवर पोहोचला आहे.

विशेष म्हणजे, मागील वर्षी याच कालावधीत हा साठा केवळ ५ ते ६ टक्क्यांदरम्यान होता.गेल्या काही दिवसांपासून गंगापूर, दारणा आणि नांदूरमध्यमेश्वर या प्रमुख धरणांतून पाण्याचा विसर्ग सुरू आहे. गंगापूर धरणातून तब्बल ४ हजार क्यूसेक वेगाने पाण्याचा विसर्ग करण्यात येत आहे.

त्यामुळे गोदावरी नदीच्या पाणीपातळीत लक्षणीय वाढ झाली असून नदीकाठच्या नागरिकांना सतर्कतेचा इशारा देण्यात आला आहे.प्रशासनाकडून सतत परिस्थितीवर लक्ष ठेवण्यात येत असून नागरिकांनी नदीच्या काठावर जाणे टाळण्याचे आवाहन करण्यात आलं आहे.