Nashik : नाशिकमध्ये पावसाचा धुमाकूळ, गोदावरीला सहाव्या दिवशीही पूर परिस्थिती |VIDEO

नाशिकमध्ये मुसळधार पावसाचा परिणाम म्हणून गोदावरी नदीला आलेली पूरस्थिती आज सहाव्या दिवशीही कायम आहे. शहरातील प्रमुख घाट परिसरात पाण्याची पातळी सातत्यानं वाढत असून, धार्मिक दृष्टिकोनातून महत्त्वाचे समजले जाणारे रामकुंड आणि गोदा घाट पूर्णतः पाण्याखाली गेले आहेत.दुतोंड्या मारुतीच्या मूर्तीपर्यंत गोदावरीचं पाणी पोहोचल्यामुळे पूरस्थितीची तीव्रता स्पष्टपणे दिसून येत आहे. या भागातील अनेक लहान-मोठी मंदिरे पाण्याखाली गेली असून, काही मंदिरांना पुराच्या पाण्याचा वेढा पडला आहे.

संतांच्या पालख्या, स्नान सोहळे आणि धार्मिक विधींमध्ये वापरले जाणारे घाट आता जलमय झाल्याने प्रशासनाने खबरदारीचा इशारा दिला आहे. सुरक्षा उपाययोजना म्हणून घाट परिसरात नागरिकांच्या प्रवेशावर बंदी घालण्यात आली असून, पोलिस आणि आपत्ती व्यवस्थापन दल तैनात आहे. नागरिकांना पुराच्या पाण्यात न जाण्याचे आणि सुरक्षित अंतर राखण्याचे आवाहन प्रशासनाकडून करण्यात आलं आहे.