Accident Video : छत्रपती संभाजीनगरमध्ये 'ड्रंक अॅंड ड्राईव्ह'चा थरार, मद्यधुंद तरूणांनी कारला उडवलं

मुंबई : छत्रपती संभाजीनगरमध्ये दोन मद्यधुंद तरूणांच्या गाडीने कारला उडवलं. या कारमध्ये असलेल्या चारजणांचा मृत्यू झाल्याचं समोर आलंय. ही ड्रंक अॅंड ड्राईव्हची घटना अहदनगर रोडवरील लिंबेजळगाव परिसरात घडलेली आहे. या भीषण अपघातामध्ये आजी, आईसह दीड महिन्याचा चिमुकला आणि सात वर्षीय चिमुकलीचा जागीच मृत्यू झालाय.

संभाजीनगर शहरापासून जवळच असलेल्या अहदनगर रोडवरील टोलनाक्याजवळ हा भीषण अपघात झाला. धक्कादायक म्हणजे दारू पिऊन गाडी चालवणारे दोन तरूण दुभाजकांना ओलांडून पलीकडे जाऊन कारला धडकले होते. अमरावती येथील अजय देसरकर यांचे हे कुटुंब होतं. मृणाली अजय देसरकर , आशालता हरिहर पोपळघट, अमोघ देसरकर आणि दुर्गा गीते अशी मृतांची ओळख पटलीय. तर अपघातात अजय देसरकर गंभीर जखमी झालेत. या प्रकरणी अपघाताला कारणीभूत ठरलेल्या दोन्ही तरूणांवर सदोष मनुष्यवधाचा गुन्हा दाखल करण्यात आला आहे.