Rain News : कन्नड तालुक्यात ढगफुटीसदृश्य पाऊस; जमिनी खरडल्या पिके गेली वाहून, पाहा VIDEO

छत्रपती संभाजीनगर : मागील दोन दिवसांपासून मराठवाडा आणि विदर्भात परतीच्या पावसाने चांगलाच धुमाकूळ घातला आहे. छत्रपती संभाजीनगर जिल्ह्यातील कन्नड तालुक्याला पावसाने अक्षरश: झोडपून काढलं आहे. यामुळे शेतजमिनी खरडून गेल्या असून खरीप हंगामातील पिके वाहून गेली आहे. हातातोंडाशी आलेला घास पावसाने हिरावून घेतल्याने बळीराजाला अश्रू अनावर झाले आहे.

सरकारने तातडीने पंचनामे करुन नुकसानभरपाई जाहीर करावी, अशी मागणी शेतकरी करीत आहेत. मिळालेल्या माहितीनुसार, कन्नड तालुक्यातील सायगव्हाण परिसरात रविवारी रात्री ढगफुटी सदृश्य पाऊस झाल्यामुळे शेती पिकाचे अतोनात नुकसान झाले. मुसळधार पावसामुळे कन्नड तालुक्यातील गडदगड नदीला पूर आला.

वेचणीला आलेला कापूस, काढलेल्या मका पिकाचे मोठे नुकसान झाले आहे. साडे अकरा ते पहाटे चार वाजेपर्यंत पाऊस सुरूच होता. शेतात आणि शेतातील नागरिकांच्या घरात पाणी घुसल्याने जनजीवन विस्कळित झाले. शासनाने त्वरीत या भागातील नुकसानीचे पंचनामे करून शेतकऱ्यांना मदत द्यावी अशी मागणी शेतकरी करताय.