भाजप उमेदवाराच्या मुलाची अजित पवारांच्या कार्यकर्त्याला मारहाण, VIDEO

गोपाल मोटघरे, पिंपरी-चिंचवड

महापालिका निवडणुकांसाठी १५ जानेवारीला मतदान होणार आहे. निवडणूक प्रचाराची सांगता होण्यास अवघे काही तास शिल्लक राहिले आहेत. त्यानंतर छुपा प्रचार सुरू होणार आहे. निवडणूक काळात भरमसाठ पैसा वाटला जात आहे, असा आरोप होत आहे. मतदारांना पैशांचे प्रलोभन दाखवून मते खरेदी करण्याचे प्रकार उघडकीस येत आहेत. तसे अनेक ठिकाणचे व्हिडिओ सोशल मीडियावर व्हायरल होत आहेत. पिंपरी-चिंचवडमध्ये तर पैसे वाटल्याच्या संशयावरून भाजप उमेदवाराच्या मुलानं अजित पवार यांच्या राष्ट्रवादी काँग्रेसच्या कार्यकर्त्याला मारहाण केली आहे.

पिंपरी-चिंचवड शहरात प्रभाग क्रमांक २१ मधील भारतीय जनता पक्षाचे उमेदवार नाणीक उर्फ नरेश पंजाबी यांच्या मुलाने एका राष्ट्रवादी काँग्रेसच्या कार्यकर्त्याला मारहाण केली. मतदारांना पैसे वाटल्याच्या संशयावरून नाणिक उर्फ नरेश पंजाबी यांचा मुलगा मनीष पंजाब याने राष्ट्रवादी काँग्रेसचे कार्यकर्ते प्रदीप जगताप यांना मारहाण केल्याचा व्हिडिओ व्हायरल होत आहे. प्रभाग क्रमांक २१ मधील वैभव नगर या ठिकाणी काल, रविवारी ही घटना घडली.