Ajit Pawar Death: अजितदादांच्या अपघातप्रकरणी गुन्हा दाखल करा, बारामतीकर आक्रमक; पोलिस ठाण्याबाहेर मोठी गर्दी

राज्याचे उपमुख्यमंत्री अजित पवारांच्या विमान अपघाताप्रकरणी डीजीसीए आणि व्हीएसआर कंपनीविरोधात एफआयआर दाखल करण्यासाठी आमदार रोहित पवार आज बारामती तालुका पोलिस ठाण्यामध्ये दाखल झाले आहेत. यावेळी रोहित पवार यांच्यासोबत त्यांचे वडील राजेंद्र पवार आणि युगेंद्र पवार हे देखील आहेत. बारामती पोलिस स्टेशनबाहेर बारामतीकरांनी मोठी गर्दी केली आहे. एफआयआर दाखल करून घेण्यात यावी यासाठी बारामतीकर आक्रमक झाले आहेत.

यावेळी 'एकच वादा अजितदादा', 'अमर रहे अमर रहे अजितदादा अमर रहे', 'परत या परत या अजितदादा परत या', अशा घोषणा बारामतीकर देत आहेत. आमच्या दादांना न्याय मिळवून द्यावा ही विनंती बारामतीकरांनी केली आहे. हा लढा सामान्य लोकांचा आहे. नेत्यांनीही या लढ्याला पाठिंबा द्यावा, असे रोहित पवार यांनी सांगितले. दरम्यान याप्रकरणी मुंबईतील मरीन ड्राईव्ह पोलीस ठाण्यात बुधवारी आमदार रोहित पवार आणि आमदार अमोल मिटकरींनी एफआयआर दाखल करण्याचा प्रयत्न केला. मात्र पोलिसांनी एफआयआर नोंदवून घेण्यास नकार दिला होता. यावरुन पोलिस आणि रोहित पवारांमध्ये वाद झाला होता.