अलिबागमध्ये संतापजनक घटना, व्हॅन चालकाचा नववीच्या मुलीवर अत्याचार

अलिबाग तालुक्यातील मांडवा सागरी पोलीस ठाण्याच्या हद्दीत एक संतापजनक घटना उघडकीस आली आहे. शाळेत ये-जा करणाऱ्या एका अल्पवयीन विद्यार्थिनीचा विनयभंग केल्याप्रकरणी स्कूल व्हॅन चालकाविरोधात 'पॉक्सो' (POCSO) कायद्यांतर्गत गुन्हा दाखल करण्यात आला आहे. या घटनेमुळे पालकांमध्ये भीती आणि संतापाचे वातावरण निर्माण झाले आहे.

मिळालेल्या माहितीनुसार, इयत्ता नववीत शिकणारी विद्यार्थिनी नेहमीप्रमाणे व्हॅनने शाळेत जात असताना चालकाने तिच्याशी अश्लील वर्तन करून विनयभंग केला. घरी परतल्यानंतर पीडित विद्यार्थिनीने हा प्रकार पालकांना सांगितला. त्यानंतर पालकांनी तात्काळ पोलिसांकडे धाव घेऊन तक्रार नोंदवली.

मांडवा सागरी पोलिसांनी या तक्रारीची गंभीर दखल घेत आरोपी चालकाविरुद्ध भारतीय न्याय संहिता आणि ‘पॉक्सो’ कायद्यांतर्गत गुन्हा दाखल केला असून पुढील तपास सुरू आहे. या घटनेमुळे विद्यार्थ्यांच्या, विशेषतः विद्यार्थिनींच्या सुरक्षेचा मुद्दा पुन्हा एकदा ऐरणीवर आला आहे.