Ajit Pawar News : बंद करायला तुमच्या घरची योजना आहे का?; लाडक्या बहिणीवरून अजित पवार संतापले

लाडकी बहीण योजनेवर विरोधकांनी केलेल्या टीकेला अजित पवार यांनी नाशिकमधील पिंपळगाव येथील सभेत चोख प्रत्युत्तर दिले. शून्य टक्के व्याजाने मी माझ्या पुण्यातील शेतकऱ्यांना पीक कर्ज देतो. शेतकऱ्यांचं भलं होणार नाही का? माय माऊली आहेत. त्यांच्यासाठी योजना आणली. काही जण त्याच्या विरोधात कोर्टात गेले. आमचं सरकार येईल तेव्हा योजना बंद करू असे म्हणाले. ही योजना काय तुमच्या घरची आहे का? असा सवालही त्यांनी केला.

आम्ही काही गरिबांना दिलं ना? जातपात बघितली नाही. ही आमची बहीण आहे ना...मग तिला मिळालं पाहिजे. तिला मान-सन्मान प्रतिष्ठा मिळवून दिली, असंही अजित पवार म्हणाले.

लाडकी बहीण योजनेवरून पवार यांनी पुन्हा विरोधकांना लक्ष्य केले. आम्ही थेट खात्यावर पैसे देतो. मध्यस्थी कोणीच नाही. आचारसंहिता लागणार म्हणून ऑक्टोबरलाच पैसे दिले. काळजी करू नका. ही योजना पाच वर्षे राबवायची आहे, असं आश्वासनही अजित पवार यांनी यावेळी दिले.