Nashik News : नाफेडचे वरिष्ठ अधिकारी थेट पिंपळगावात !

गेल्या काही दिवसांपासून चर्चेत असलेला नाफेडचा कांदा घोटाळा आता थेट पंतप्रधान कार्यालयापर्यंत पोहोचला आहे. या घोटल्याची दाखल पंतप्रधान कार्यालयाने घेतली असून चौकशीसाठी गुजरातच्या अधिकाऱ्यांचं पथक नाशिक जिल्ह्यातील पिंपळगाव - बसवंतमध्ये दाखल झालं आहे. या पथकाने मंगळवारी नाफेडच्या कार्यालयात जाऊन 3 अधिकाऱ्यांची चौकशी केली आहे.

नाफेडमधील काही भ्रष्ट अधिकारी आणि शेतकऱ्यांशी संबंध नसणाऱ्या काही घोटाळेबाज शेतकरी उत्पादक कंपन्यांच्या माध्यमातून होत असलेल्या कोट्यावधीचा कांदा गैरव्यवहार प्रकरण चांगलेच चर्चेत आहे. त्याची दाखल घेऊन गुजरातचे पथक अचानक पिंपळगाव - बसवंतमध्ये दाखल झाल्याने येथील नाफेडच्या अधिकाऱ्यांची धांदल उडाली आहे. अधिकाऱ्यांच्या चौकशीनंतर तक्रारदार शेतकरी गोरख संत आणि पिंपळगाव बसवंत येथे पंतप्रधान यांच्या कार्यक्रमात जाऊन थेट प्रश्न विचारणारी किरण सानप यांच्याशी देखील चर्चा केली. जवळपास 40 मिनिटे केलेल्या या चर्चेत अधिकाऱ्यांनी तक्रारीचे पुरावे देखील मागितले आहेत.