Ashadhi Wari: श्रींच्या पालखीचे पंढरपूरसाठी प्रस्थान, ७०० वारकऱ्यांचा सहभाग, विदर्भाच्या पंढरीतून वारीला सुरूवात|VIDEO

संजय जाधव, साम टीव्ही

शेगांव: पंढरपूर येथील आषाढी एकादशी यात्रा महोत्सवात सहभागी होण्याचे संस्थानचे हे ५६ वे वर्ष आहे. श्रींच्या पालखीत जवळपास सातशे वारकऱ्यांसह, टाळकरी, वारकरी, पताकाधारी, हरीनामाच्या गजरात जय हरी विठ्ठल श्री हरी विठ्ठल नामाचा जप करत संत नगरीतून पंढरपूरकडे प्रस्थान केले आहे. एकादशीला भूवैकुंठ पंढरपूरच्या विठोबाची महायात्रा आषाढी, कार्तिकी, चैत्र व माघी अशा चार एकादशीला पंढरपूरला भरते.

जो नित्याने वारंवार पंढरपूरला जातो तो वारकरी होय. श्री संत गजानन महाराजांच्या पुनीत वास्तव्याने पावन झालेल्या शेगाव नगरीला विदर्भाचे पंढरपूर म्हणून गौरविल्या जाते. पंढरीनाथाच्या भेटीसाठी प्रत्यक्ष शेगावच्या योगी गजाननाने हजारो वारक-यांसह वारी केल्याचे दाखले मिळतात. त्यामुळे येथील वारीला असलेली परंपरा ही संतांनी दाखविलेल्या मार्गावर गेल्या ५५ वर्षापासून अव्याहतपणे जपली जात आहे.

ज्येष्ठ शुद्ध ७, २ जून रोजी महाराजांची पालखी सकाळी ७ वाजता विधिवत पूजन झाल्यानंतर विठूरायाच्या भेटीला मार्गस्थ होणार आहे. टाळ, मृदंग वाजत, गाजत, शेकडो वारकरी हातात भागवत धर्माची पताका व मुखी हरी नामाचा गजर करीत श्रींच्या पालखीसह पंढरीची वाट धरतात. श्रीच्या दिंडीमध्ये, पताकाधारी, गायक, मुंदगवादक, सेवेकरी अशा एकूण सातशे जणांचा समावेश राहणार आहे.