जबरदस्त! जयस्वालनं वेस्ट इंडीजची केली धुलाई, शतक ठोकलं; जे फक्त सचिन तेंडुलकरला जमलं, ते यशस्वीलाच करता आलं

गुजरातच्या अहमदाबादमध्ये 'खामोश' असलेली यशस्वी जयस्वालची बॅट दिल्लीत तळपली. पहिल्या कसोटीतील कसर त्यानं दिल्लीतील दुसऱ्या कसोटीत भरून काढली. वेस्ट इंडीजच्या गोलंदाजांना अक्षरशः मेटाकुटीला आणलं. पहिल्याच डावात यशस्वीनं जबरदस्त शतकी खेळी केली. कसोटी कारकीर्दीत त्यानं सातव्यांदा शतक ठोकण्याची किमया केली.

यशस्वी जयस्वाल यानं वेस्ट इंडीजविरुद्ध मायदेशातील मैदानावर पहिलं शतक झळकावलं आहे. तर या संघाविरोधात त्याचं हे दुसरं शतक आहे. यशस्वीने या शतकी खेळीसह आणखी काही रेकॉर्ड आपल्या नावावर नोंदवले आहेत.

पहिल्या बॉलपासूनच फॉर्मात

यशस्वी जयस्वाल यानं डावाची सुरुवात अत्यंत संयमाने केली. बऱ्याचदा यशस्वी हा वेगवान सुरुवात करतो. मात्र, दिल्लीच्या या खेळपट्टीवर त्यानं स्थिरस्थावर होण्यासाठी बराच वेळ घेतला. यशस्वीने केएल राहुलसोबत पहिल्या विकेटसाठी १५.४ षटकांत ५० धावा जोडल्या. राहुल बाद झाल्यानंतर जयस्वालनं डाव सावरला. १० चौकारांच्या मदतीने ८२ चेंडू खेळून काढत अर्धशतक पूर्ण केले. साई सुदर्शनसोबत शतकी भागीदारी रचली. टीम इंडियाला त्यानं मजबूत स्थितीत आणलं आहे. त्यानंतर जयस्वालनं १४५ चेंडू खेळून काढत शतक पूर्ण केलं.

जयस्वालनं रेकॉर्डचा पाऊस

यशस्वी जयस्वाल हा स्फोटक खेळीसाठी ओळखला जातो. पण खेळपट्टीचा अंदाज घेत दिल्ली कसोटीत त्यानं संयमी सुरूवात केली आणि शतकी खेळी साकारली. सुनील गावसकर यांच्यानंतर कसोटीत भारतासाठी सर्वात वेगवान ३००० धावा करणारा यशस्वी दुसरा खेळाडू ठरला आहे. त्याने ७१ डावांत या धावा केल्या आहेत. सुनील गावसकर यांनी ६९ डावांत ३००० धावा केल्या होत्या.

सचिननंतर यशस्वीच!

यशस्वी जयस्वाल हा अवघ्या २३ वर्षांचा आहे. आंतरराष्ट्रीत कसोटीत यशस्वीने आतापर्यंत ७ शतके ठोकली आहेत. इतक्या कमी वयात सर्वाधिक शतके फक्त सचिन तेंडुलकर याने केली होती. सचिनने ११ शतके ठोकली होती. जयस्वाल यानं वर्ल्ड टेस्ट चॅम्पियनशिपमध्ये शतकांच्या बाबतीत पंत आणि केएल राहुल या दोघांना मागे टाकले आहे. या दोघांनीही प्रत्येकी सहा शतके केली आहेत. तर जयस्वालची सात शतके झाली आहेत.