Virat Kohli Record: विराटच्या रडारवर मास्टर ब्लास्टरचा महारेकॉर्ड! तिसऱ्या सामन्यात रचणार इतिहास?

भारतीय संघातील अनुभवी फलंदाज विराट कोहली हा वनडे क्रिकेटमधील स्टार फलंदाज आहे. वनडे क्रिकेटमध्ये त्याचा रेकॉर्ड दमदार राहिला आहे. आतापर्यंत खेळलेल्या २९४ सामन्यांमध्ये त्याने १३८८६ धावा केल्या आहेत. यादरम्यान त्याने ५० शतकं झळकावली आहेत. यासह ७२ अर्धशतकं झळकावली आहेत.

वनडेत शानदार रेकॉर्ड राहिला असला तरीदेखील विराट कोहलीला श्रीलंकेविरुद्ध सुरू असलेल्या सुरुवातीच्या दोन्ही वनडेत त्याला हवी तशी कामगिरी करता आलेली नाही. सुरुवातीच्या दोन्ही सामन्यांमध्ये तो स्वस्तात माघारी परतला आहे. मालिकेतील दुसऱ्या सामन्यात तो जेफ्री वँडर्सेच्या जाळ्यात अडकला आणि अवघ्या १४ धावा करत माघारी परतला. दरम्यान सुरुवातीच्या दोन्ही सामन्यांमध्ये स्वस्तात माघारी परतल्यानंतर तिसऱ्या सामन्यात त्याच्याकडून चांगल्या कामगिरीची अपेक्षा असणार आहे. या सामन्यात त्याला भारताचा दिग्गज फलंदाज सचिन तेंडुलकरचा रेकॉर्ड मोडून काढण्याची संधी असणार आहे.

२७००० धावा पूर्ण करण्याची संधी

भारत आणि श्रीलंका यांच्यातील तिसरा वनडे सामना ७ ऑगस्ट रोजी खेळला जाणार आहे. या सामन्यात अवघ्या ७८ धावा पूर्ण करताच तो सचिन तेंडुलकरला मागे सोडणार आहे. या सामन्यात ७८ धावा पूर्ण करताच तो आंतरराष्ट्रीय क्रिकेटमध्ये २७००० धावा पूर्ण करणार आहे.

केवळ ३ फलंदाजांना जमलाय हा कारनामा

विराट कोहली आंतरराष्ट्रीय क्रिकेटमधील त्या निवडक खेळाडूंपैकी एक आहे, ज्याच्या नावे अनेक मोठ मोठ्या विक्रमांची नोंद आहे. दरम्यान आंतरराष्ट्रीय क्रिकेटमध्ये केवळ ३ असे फलंदाज आहेत ज्यांना २७००० धावा करता आल्या आहेत. ज्यात भारताकडून सचिन तेंडुलकर, ऑस्ट्रेलियाचा रिकी पाँटिंग आणि श्रीलंकेच्या कुमार संगकाराचासम समावेश आहे.