आयसीसी टी -२० वर्ल्डकप २०२४ स्पर्धेत भारतीय संघ साखळी फेरीतील शेवटचा सामना खेळण्यासाठी मैदानात उतरणार आहे. भारताचा शेवटचा सामना हा कॅनडाविरुद्ध होणार आहे. हा सामना फ्लोरीडामध्ये होणार असून भारतीय वेळेनुसार रात्री ८ वाजता सुरू होईल. भारतीय संघाने साखळी फेरीत आतापर्यंत आयर्लंड, पाकिस्तान आणि अमेरिकेला धूळ चारली आहे. या ३ विजयांसह भारतीय संघाने सुपर ८ मध्ये दणक्यात एन्ट्री केली आहे. साखळी फेरीतील शेवटचा सामना जिंकून भारतीय संघ नंबर १ राहण्याच्या प्रयत्नात असणार आहे.
या स्पर्धेतील सुरुवातीच्या तिन्ही सामन्यांमध्ये विराट कोहली आणि रोहित शर्मा यांच्या जोडीने डावाची सुरुवात केली आहे.या सामन्यातही ही जोडी डावाची सुरुवात करताना दिसून येऊ शकते. हे दोघे सेट झाले तर ते कुठल्याही गोलंदाजी आक्रमणाला फोडून काढू शकतात.
त्यानंतर तिसऱ्या क्रमांकावर रिषभ पंत फलंदाजी करण्यासाठी येऊ शकतो.आतापर्यंत झालेल्या सामन्यांमध्ये रिषभ पंत तिसऱ्या क्रमांकावर फलंदाज येतोय आणि या क्रमांकावर फलंदाजी करताना त्याने आपली जबाबदारी योग्यरीत्या पार पाडली आहे. तर चौथ्या क्रमांकावर सूर्यकुमार यादव फलंदाजी करताना दिसून येऊ शकतो. गेल्या सामन्यात सूर्यकुमार यादवनेही अर्धशतकी खेळी करत भारतीय संघाला विजय मिळवून दिला होता.
या सामन्यात शिवम दुबे पाचव्या क्रमांकावर फलंदाजी करताना दिसून येऊ शकतो. तर हार्दिक पंड्या सहाव्या क्रमांकावर फलंदाजीला येऊ शकतो. हे दोघेही मधल्या षटकांमध्ये मोठे फटके खेळू शकतात. त्यामुळे या दोघांचीही भूमिका अतिशय महत्त्वाची असणार आहे.
या सामन्यासाठी सातव्या क्रमांकावर अक्षर पटेलला संधी दिली जाऊ शकते. तर आठव्या क्रमांकावर फिरकी गोलंदाज म्हणून कुलदीप यादव खेळताना दिसून येऊ शकतो. वेगवान गोलंदाज म्हणून मोहम्मद सिराज, जसप्रीत बुमराह आणि अर्शदीप सिंग या तिघांनी चांगली गोलंदाजी केली आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.