Asia Cup 2025: आज ओमानविरूद्ध मैदानात उतरणार सूर्या ब्रिगेड; बेंचवरील खेळाडूंना मिळणार संधी?

आशिया कप 2025 मध्ये आज भारतीय टीमचा सामना ओमानशी होणार आहे. ओमानची टीम आधीच सुपर-4 च्या शर्यतीतून बाहेर पडलीये. तर भारत हा या स्पर्धेत सुपर-4 मध्ये प्रवेश करणारा पहिला संघ ठरला होता. त्यामुळे आजचा सामना औपचारिकतेसाठीच टीम इंडिया सलग तिसरा विजय मिळवत हॅट्ट्रिक करण्याच्या इराद्याने मैदानात उतरणार आहे.

सूर्या ब्रिगेड टीममध्ये बदल करणार का?

कर्णधार सूर्यकुमार यादवची ब्रिगेड जर जुना फॉर्म्युला वापरणार असेल तर संघात कोणताही बदल होणार नाही. मात्र, जर बेंच स्ट्रेंथ वापरण्याचा विचार झाला तर काही बदल दिसू शकतात. विशेषत: जसप्रीत बुमराहला वर्कलोड मॅनेजमेंट अंतर्गत विश्रांती देण्याची शक्यता आहे.

यावेळी त्यांच्या जागी डावखुरा वेगवान गोलंदाज अर्शदीप सिंहला संधी मिळू शकते. अर्शदीपने आतापर्यंत टी-20 स्वरूपात 99 विकेट्स घेतले आहेत आणि आज खेळल्यास त्याच्या शंभराव्या विकेट्सची नोंद होऊ शकते.

फलंदाजीत बदल होणार का?

फलंदाजीत फारसे बदल अपेक्षित नाहीत. परंतु फलंदाजीच्या क्रमात नक्की फेरबदल दिसण्याची शक्यता आहे. विकेटकीपर-फलंदाज संजू सॅमसनला अजूनपर्यंत खेळण्याची संधी मिळालेली नाही. आज त्याला वरच्या क्रमावर उतरवलं जाण्याची शक्यता आहे. याशिवाय अक्षर पटेल, हार्दिक पांड्या किंवा शिवम दुबे यांनाही वरच्या क्रमावर खेळवलं जाऊ शकतं.

टीम इंडियाची संभाव्य प्लेइंग 11

शुभमन गिल, अभिषेक शर्मा, सूर्यकुमार यादव (कर्णधार), तिलक वर्मा, संजू सॅमसन (विकेटकीपर), शिवम दुबे, हार्दिक पांड्या, अक्षर पटेल, कुलदीप यादव, अर्शदीप सिंह आणि वरुण चक्रवर्ती.

सामना किती वाजता?

भारत विरुद्ध ओमान यांच्यातील सामना अबूधाबीतील शेख झायेद स्टेडियमवर रात्री 8 वाजता सुरू होणार आहे. भारताने यापूर्वीच दोन्ही सामने दुबई स्टेडियमवर खेळलेत. अबूधाबीची ही नवीन परिस्थिती भारतीय टीमसाठी वेगळी आव्हानं निर्माण करू शकतं.