SRH VS MI : काळी फित बांधून खेळाडू उतरले मैदानात, पहलगाम हल्ल्याचा सामन्यावर काय परिणाम झाला?

SRH VS MI Updates : राजीव गांधी आंतरराष्ट्रीय स्टेडियमवर आज सनरायजर्स हैदराबाद विरुद्ध मुंबई इंडियन्स हा सामना सुरु झाला आहे. सामन्यात मुंबई इंडियन्सचा कर्णधार हार्दिक पंड्याने टॉस जिंकला आणि प्रथम गोलंदाजी करण्याचा निर्णय घेतला. त्यामुळे हा संघ प्रथम फलंदाजी करणार आहे. वानखेडे स्टेडियमवर मुंबईने हैदराबादचा दारुण पराभव केला होता. या पराभवाचा वचपा हैदराबादचा संघ काढण्याच्या बेतात आहे.

टॉसदरम्यान हर्षा भोगले यांनी हार्दिक पंड्या आणि पॅट कमिन्स या दोन्ही कर्णधारांशी संवाद साधला. दोघांनीही कालच्या पहलगाममध्ये झालेल्या दहशतवादी हल्ल्याचा जाहीर निषेध केला. काश्मीरच्या पहलगाम येथील दहशतवादी हल्ल्यातील मृतकांना श्रद्धांजली म्हणून सामन्यापूर्वी एक मिनिट मौन पाळण्यात आले. भ्याड हल्ल्याचा निषेध म्हणून हैदराबाद आणि मुंबई या दोन्ही संघांच्या खेळाडूंसह सर्वांनी हातावर काळी पट्टी बांधली आहे. आजच्या सामन्यात चियरलीडर्स, डीजे, आतषबाजी रद्द करण्यात आले आहेत.

टॉस झाल्यानंतर दोन्ही कर्णधारांनी आपापल्या ११ शिलेदारांच्या नावाची घोषणा केली. मुंबईने मागच्या सामन्यात अश्वनी कुमारला संधी दिली होती. आजच्या सामन्यामध्ये अश्वनीच्या जागी विग्नेश पुथुरला संघात सामील करण्यात आले आहे. खराब फॉर्ममुळे हैदराबादच्या संघाने मोहम्मद शमीला प्लेईंग ११ मधून वगळले आहे.

मुंबई इंडियन्सची प्लेईंग ११ -

रायन रिकल्टन, विल जॅक्स, सूर्यकुमार यादव, तिलक वर्मा, हार्दिक पंड्या (कर्णधार), नमन धीर, मिचेल सँटनर, दीपक चहर, ट्रेंट बोल्ड, जसप्रीत बुमराह, विग्नेश पुथूर.

सनरायजर्स हैदराबादची प्लेईंग ११ -

अभिषेक शर्मा, ट्रेव्हिस हेड, इशान किशन, नितीश कुमार रेड्डी, हेनरिक क्लासेन, अनिकेत वर्मा, पॅट कमिन्स (कर्णधार), जयदेव उनदकट, हर्षल पटेल, ईशान मलिंगा, झीशान अन्सारी.