Rohit Sharma Record : रोहित शर्मानं ऑस्ट्रेलियात रचला इतिहास; विराट, सचिन तेंडुलकरही मागे पडले

रोहित शर्माचा विक्रम

अॅडलेड वनडे सामना सुरू होण्याआधी रोहित शर्मा यानं ऑस्ट्रेलियाविरुद्ध त्यांच्याच देशात २० वनडे सामन्यांत ९९८ धावा केल्या होत्या. दुसऱ्या वनडे सामन्यात दोन धावा घेताच रोहित ऑस्ट्रेलियात त्यांच्याविरुद्ध १००० धावा करणारा पहिला भारतीय फलंदाज ठरला आहे. रोहित शर्मानं डावाची सुरुवात अत्यंत सावधपणाने केली. सेट झाल्यानंतर त्यानं सुरेख फटके लगावले. ७३ धावा करून तो बाद झाला. भारत विरुद्ध ऑस्ट्रेलिया वनडेमध्ये दोन्ही संघातील फलंदाजांमध्ये रोहितनं सर्वाधिक धावा केल्या आहेत. ऑस्ट्रेलियात त्यांच्याच विरोधात आतापर्यंतच्या २१ वनडे सामन्यांत १०७१ धावा केल्या आहेत. १७१ धावांची त्यानं सर्वोच्च खेळी केली आहे.

विराट कोहली दुसऱ्या स्थानी

ऑस्ट्रेलियाविरुद्ध दुसऱ्या वनडे सामन्यातही विराट कोहलीला खातं उघडता आलं नाही. वनडे करिअरमध्ये पहिल्यांदाच तो सलग दोनदा शून्यावर बाद झाला आहे. तरीही भारत विरुद्ध ऑस्ट्रेलिया वनडेमध्ये सर्वाधिक धावा करणाऱ्या फलंदाजांच्या यादीत तो दुसऱ्या स्थानी आहे. त्यानं आतापर्यंत ८०२ धावा केल्या आहेत.

सचिन तेंडुलकर अजूनही टॉप ३

या यादीत तिसऱ्या स्थानी जगातील महान फलंदाज सचिन तेंडुलकर आहे. त्यानं ऑस्ट्रेलियाच्या विरोधात २५ वनडे सामन्यांत ७४० धावा केल्या आहेत. त्यात एक शतक आणि ५ अर्धशतके आहेत. ऑस्ट्रेलियात त्यांच्याच विरोधात सचिन तेंडुलकरची सर्वोच्च वैयक्तीक धावसंख्या ११७ आहे.

महेंद्रसिंह धोनी

महेंद्रसिंह धोनी हा या यादीत चौथ्या स्थानी आहे. धोनीने ऑस्ट्रेलियाच्या भूमीत त्यांच्याच संघाविरोधात २१ वनडे सामन्यांत ५ अर्धशतकांसह ६८४ धावा केल्या आहेत. धोनीने सर्वाधिक नाबाद ८७ धावा केल्या आहेत.

स्टीव्ह स्मिथ एकमेव ऑस्ट्रेलियन फलंदाज

या यादीत पाचव्या स्थानी ऑस्ट्रेलियाचा स्टीव्ह स्मिथ आहे. टॉप ५ लिस्टमध्ये ऑस्ट्रेलियाचा हा एकमेव फलंदाज आहे. त्यानं ऑस्ट्रेलियात भारताविरुद्ध ११ वनडे सामन्यांत ६८३ धावा केल्या आहेत. त्यात त्याने ४ शतके आणि एक अर्धशतक झळकावलं आहे. १४९ त्याची सर्वोच्च धावसंख्या आहे.