IPL 2025 : राजस्थान रॉयल्सला मोठा धक्का, तगडा खेळाडू संघाबाहेर; प्लेऑफमध्ये जाण्याच्या आशांवर पाणी?

Rajasthan Royals IPL 2025 : आयपीएल २०२५ च्या पॉईंट्स टेबलवर राजस्थान रॉयल्सचा संघ आठव्या स्थानी आहे. राजस्थानच्या संघाने एकूण ८ सामने खेळले आहेत. त्यातील ६ सामन्यांमध्ये राजस्थानचा पराभव झाला आहे. राजस्थानचा संघ प्लेऑफच्या स्पर्धेत खूप मागे पडला आहे. खराब फॉर्म सुरु असताना राजस्थान रॉयल्सला मोठा धक्का बसला आहे. संजू सॅमसन दुखापतग्रस्त झाल्याने राजस्थानच्या चिंता वाढल्या आहेत.

राजस्थान रॉयल्स विरुद्ध दिल्ली कॅपिटल्स या सामन्यात फलंदाजी करताना संजू सॅमसनला दुखापत झाली होती. त्रास सहन न झाल्याने संजूने रिटायर्ड हर्ट होऊन डगआउटमध्ये जाण्याचा निर्णय घेतला होता. दुखापतीच्या कारणामुळे लखनऊ विरुद्धच्या सामन्यातून त्याला वगळण्यात आले होते. आता २४ एप्रिल रोजी खेळल्या जाणाऱ्या राजस्थान विरुद्ध बंगळुरू सामन्यात संजू खेळणार नाही अशी माहिती समोर आली आहे.

'संजू सॅमसन सध्या दुखापतीतून सावरत आहे. तो सध्या जयपूरमधील राजस्थान रॉयल्सच्या वैद्यकीय कर्मचाऱ्यांसोबत आहे. रिहॅबमध्ये असल्याने आरसीबी विरुद्धच्या सामन्यात तो खेळणार नाही. संघ व्यवस्थापन त्याच्या प्रकृतीवर बारकाईने लक्ष ठेवून आहे. लवकरच तो पुनरागमन करेल अशी आशा आहे', असे राजस्थान रॉयलच्या अधिकृत पत्रकामध्ये म्हटले आहे.

लखनऊ विरुद्धच्या सामन्यात राजस्थानने संजू सॅमसन दुखापतग्रस्त असल्याने १४ वर्षांच्या वैभव सूर्यवंशीला खेळण्याची संधी दिली होती. या संधीचे वैभवने सोने केले. २० चेंडूंमध्ये ३४ धावा करत त्याने सर्वांची मने जिंकली. आता संजू आरसीबी विरुद्धच्या सामन्यात खेळणार नसल्याने पुन्हा वैभवला संधी दिली जाईल का असा प्रश्न उपस्थित झाला आहे.