DSP Mohammed Siraj : DSP मोहम्मद सिराज! तेलंगणात पोलीस उपअधीक्षकपदाची सूत्रे स्वीकारली

Mohammad Siraj became DSP : भारत आणि न्यूझीलंड यांच्यात तीन सामन्यांच्या कसोटी मालिकेला १६ ऑक्टोबरपासून सुरुवात होत आहे. तत्पूर्वीच टीम इंडियाचा वेगवान गोलंदाज मोहम्मद सिराजला तेलंगणा सरकारकडून मोठं गिफ्ट मिळालं आहे. सिराजनं पोलीस उपअधीक्षकपदाची सूत्रे स्वीकारली आहेत.

सिराजनं स्वीकारला पदभार

मोहम्मद सिराज यानं शुक्रवारी तेलंगणा पोलीस महासंचालकांना रिपोर्ट केल्यानंतर पोलीस उपअधीक्षकपदाचा भार स्वीकारला. यावर्षी जुलैमध्ये तेलंगणा सरकारनं सिराजसह बॉक्सिंगपटू निकहत जरीनचंही उत्कृष्ट कामगिरी केल्याबद्दल कौतुक केलं होतं. तसंच ग्रुप १ मध्ये नोकरी देण्याची घोषणा केली होती.

राज्याचे मुख्यमंत्री ए. रेवंथ रेड्डी यांनी घोषणा केल्यानंतर राज्य सरकारने या नियुक्त्यांचा मार्ग अधिक सुकर व्हावा यासाठी तेलंगणा अधिनियमात सुधारणा केली होती.

टीम इंडियानं टी २० वर्ल्डकप जिंकल्यानंतर तेलंगणाचे मुख्यमंत्री रेड्डी यांनी जूनमध्ये मोहम्मद सिराजला नोकरी देणार असल्याची घोषणा केली होती. वर्ल्डकप विजेत्या संघात सिराज हा तेलंगणाचा एकमेव खेळाडू होता. याआधीही सिराजने वर्ल्ड टेस्ट चॅम्पियनशिप फायनल आणि वनडे वर्ल्डकपमध्ये चमकदार कामगिरी केली होती.

गेल्या वर्षी श्रीलंकेविरुद्ध फायनलमध्ये सिराजने सहा विकेट घेत भारताला आशिया चषक जिंकून देण्यात मोलाचा वाटा उचलला होता. सिराज सध्या टीम इंडियात क्रिकेटच्या तिन्ही प्रकारात आपलं योगदान देत आहे.

सिराजनं बांगलादेशविरुद्धच्या कसोटी मालिकेतही उत्कृष्ट कामगिरी केली होती. या मालिकेत त्याने ४ विकेट घेतल्या होत्या. भारतानं ही मालिका २-० ने जिंकली. सिराज आता न्यूझीलंडविरुद्धच्या कसोटी मालिकेत खेळताना दिसणार आहे. पहिला कसोटी सामना १६ ऑक्टोबरपासून सुरू होणार आहे. न्यूझीलंडविरुद्धच्या कसोटी मालिकेनंतर टीम इंडिया पाच सामन्यांच्या कसोटी मालिकेसाठी ऑस्ट्रेलियाचा दौरा करणार आहे.