आशिया चषकाचा अंतिम सामना कुठलाही क्रिकेट चाहता विसरू शकणार नाही. श्रीलंकेविरूद्ध झालेल्या या सामन्यात भारतीय संघातील वेगवान गोलंदाज मोहम्मद सिराजच्या गोलंदाजीची जादू पाहायला मिळाली होती.
या सामन्यात गोलंदाजी करताना सिराजने ६ गडी बाद केले होते. या कामगिरीचा फायदा त्याला आयसीसीच्या वनडे रँकिंगमध्ये झाला आहे. नुकताच जाहीर करण्यात आलेल्या यादीत मोहम्मद सिराजने अव्वल स्थानी झेप घेतली आहे.
आशिया चषक सुरू होण्यापूर्वी मोहम्मद सिराज ६४३ गुणांसह नवव्या स्थानी होता. मात्र आशिया चषकात केलेल्या दमदार कामगिरीच्या बळावर त्याने ८ स्थानांची झेप घेत अव्वल स्थान गाठलं आहे.
आता त्याचे रेटिंग पाँइंट्स ६९४ इतके आहेत. आशिया चषकात गोलंदाजी करताना त्याने १० गडी बाद केले आहेत. यापूर्वी मार्च २०२३ मध्ये तो गोलंदाजांच्या यादीत अव्वल स्थानी विराजमान झाला होता.
येत्या ५ ऑक्टोबरपासून वनडे वर्ल्डकप २०२३ स्पर्धेला प्रारंभ होणार आहे. या स्पर्धेपूर्वी मोहम्मद सिराच पहिल्या स्थानी येणं ही भारतीय संघासाठी सकारात्मक बाब आहे. सध्या तो तुफान फॉर्ममध्ये आहे.
वर्ल्डकपमध्ये मोहम्मद सिराज आणि जसप्रीत बुमराहच्या जोडीचा सामना करणं कुठल्याही संघासाठी मुळीच सोपं नसणार आहे. श्रीलंकेविरूद्धच्या अंतिम सामन्यात ६ गडी बाद करताच त्याने वनडे कारकिर्दीत ५० गडी बाद केले आहेत. (Latest sports updates)
शुबमन गिल नंबर १ बनण्याच्या वाटेवर..
आयसीसीने जाहीर केलेल्या फलंदाजांच्या यादीत पाकिस्तानचा कर्णधार बाबर आझम अव्वल स्थानी आहे. तर भारतीय संघाचा सलामीवीर फलंदाज शुबमन गिल या यादीत दुसऱ्या स्थानी कायम आहे.
मात्र रेटिंगच्या बाबतीत तो बाबर आझमच्या जवळ पोहोचला आहे. बाबर आझमचे रेटिंग पाँइंट्स ८५७ तर शुबमन गिलचे रेटिंग पाँइंट्स ८१४ इतके आहे. दोघांमध्ये केवळ ४३ रेटिंग पाँइंट्सचा फरक आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.