Karun Nair: मला सतर्क राहावं...; बुमराहसोबत झालेल्या बाचाबाचीनंतर नायरचं मोठं विधान, सामन्यानंतर दोघांचा Video व्हायरल

आयपीएलमध्ये रविवारी मुंबई इंडियन्स विरूद्ध दिल्ली कॅपिटल्स यांच्यामध्ये सामना खेळवण्यात आला होता. या सामन्यामध्ये मुंबईचा १२ रन्सने विजय झाला. या सामन्यादरम्यान गोलंदाज जसप्रीत बुमराह आणि दिल्लीचा करूण नायर यांच्यामध्ये काहीसा वाद झाल्याचं दिसून आलं. यावेळी सामन्यातनंतर करूण नायरने बुमराहबाबत मोठं विधान केलंय. याशिवाय सामन्यानंतर या दोघांचा मिठी मारतानाचा व्हिडीओ देखील व्हायरल झाला आहे.

या सामन्यामध्ये पहिल्यांदा फलंदाजी करताना मुंबईने दिल्लीसमोर २०६ रन्सचं आव्हान ठेवलं होतं. या लक्ष्याचा पाठलाग करताना करूण नायरने ४० बॉल्समध्ये ८९ रन्सची तुफान खेळी केली. करूण फलंदाजी करत असताना सहाव्या ओव्हरमध्ये रन घेण्याच्या नादात तो बुमराहला आपटला. यानंतर नायरने बुमराहची माफीही मागितली.

टाईमआऊटमध्ये दोन्ही खेळाडू भिडले

ही घटना घडल्यानंतर टाईमआऊटमध्ये मात्र या दोन खेळाडूंमध्ये वाद झाल्याचं पाहायला मिळालं. टाईमआऊटमध्ये बुमराह नायरला काहीतरी सांगत होता. या घटनेनंतर नायर मुंबई इंडियन्सचा कर्णधार हार्दिक पंड्याला समजावून सांगत होता. या घटनेचा व्हिडीओ सोशल मीडियावर चांगलाच व्हायरल झाला.

काय म्हणाला करूण नायर?

सामन्यानंतर झालेल्या प्रेस कॉन्फ्रेंसमध्ये नायर म्हणाला की, मी एका फ्लोमध्ये खेळत होतो आणि मला तो कायम ठेवायचा होता. त्यामुळे योग्य बॉल निवडून मला त्याच दिशेने खेळायचं होतं. बुमराह सध्या जगातील बेस्ट गोलंदाज आहे. त्यामुळे मला सतर्क राहावं लागत होतं की तो कोणत्या ठिकाणी गोलंदाजी करणार आहे. मात्र मी मला जिथे रन करायचे होते तिथे केले.

दोघांनी मारली एकमेकांनी मिठी

यावेळी दिल्ली कॅपिटल्सने त्यांच्या सोशल मीडियावर सामन्यानंतरचा एक व्हिडीओ पोस्ट केलाय. या व्हिडीओमध्ये करूण नायर आणि जसप्रीत बुमराह एकमेकांना मिठी मारतायत. याशिवाय बुमराह नायरला काहीतरी सांगताना देखील दिसतोय. या व्हिडीओमुळे दोघांमध्येही सगळ्या गोष्टी आलबेल असल्याचं म्हटलं जातंय.