Riyan Parag: पहिल्या वनडेसाठी रोहितचा मास्टरप्लान! IPL गाजवणारा हा स्टार खेळाडू करणार पदार्पण

भारत आणि श्रीलंका या दोन्ही संघांमध्ये ३ वनडे सामन्यांच्या मालिकेला सुरुवात होणार आहे. आयसीसी वनडे वर्ल्डकप २०२४ स्पर्धेनंतर स्टार भारतीय खेळाडू पहिल्यांदाच वनडे क्रिकेट खेळण्यासाठी मैदानात उतरणार आहे. टी-२० मालिका झाल्यानंतर भारत आणि श्रीलंका हे दोन्ही पहिला वनडे सामना खेळण्यासाठी मैदानात येणार आहेत.

भारताचा कर्णधार रोहित शर्मा आणि विराट कोहली वनडे मालिकेतून कमबॅक करताना दिसून येणार आहे. दरम्यान या सामन्यासाठी भारतीय संघात कोणत्या ११ खेळाडूंना संधी मिळणार हे पाहणं महत्वाचं ठरणार आहे.

रियान परागला संधी मिळणार

भारतीय संघात आयपीएल गाजवणाऱ्या खेळाडूंना संधी दिली जात आहे. रियान परागला प्लेइंग ११ मध्ये स्थान दिलं गेलं होतं. टी-२० मालिकेसाठी निवड झालेल्या संघात रियान परागचा समावेश करण्यात आला होता. यासह वनडे मालिकेसाठीही त्याला भारतीय संघात संधी देण्यात आली आहे. त्याला श्रीलंकेविरुद्ध होणाऱ्या पहिल्या वनडेसाठी भारतीय संघाच्या प्लेइंग ११ मध्ये स्थान मिळण्याची शक्यता वर्तवली जात आहे.

कोणाच्या जागी मिळू शकते संधी?

वनडे मालिकेतील पहिला सामना २ ऑगस्ट रोजी कोलंबोत रंगणार आहे. कोलंबोची खेळपट्टी ही फिरकी गोलंदाजांसाठी फायदेशीर ठरते. त्यामुळे भारतीय संघात फिरकी गोलंदाजांचा समावेश पाहायला मिळू शकतो. कुलदीप यादव आणि अक्षर पटेल या दोघांचाही प्लेइंग ११ मध्ये समावेश केला जाऊ शकतो. तर शिवम दुबेला विश्रांती दिली जाऊ शकते. त्याच्याऐवजी रियान परागचा संघात समावेश केला जाऊ शकतो. रियान पराग सहाव्या क्रमांकावर फलंदाजीला येऊन फिरकी गोलंदाजीतही मोलांचं योगदान देऊ शकतो.

आयपीएल २०२४ स्पर्धेत शानदार कामगिरी

आयपीएल २०२४ स्पर्धेत रियान परागने शानदार कामगिरी केली होती. या हंगामात तो अनुशासनाने फलंदाजी करताना दिसून आला होता. राजस्थान रॉयल्स संघाकडून मधल्या फळीत खेळताना त्याने ५७३ धावा केल्या होत्या. ही त्याची आयपीएल स्पर्धेच्या इतिहासातील सर्वोत्तम कामगिरी ठरली होती. यादरम्यान त्याने ४ अर्धशतकं झळकावली होती.