IND vs NZ 3rd Test: मुंबई कसोटीसाठी टीम इंडियात बदल! स्टार गोलंदाजाला मिळणार संधी

Harshit Rana: भारत आणि न्यूझीलंड यांच्यातील ३ कसोटी सामन्यांच्या मालिकेतील शेवटचा सामना मुंबईतील वानखेडे स्टेडियमवर रंगणार आहे. या सामन्याला १ नोव्हेंबरपासून सुरुवात होणार आहे. या मालिकेत भारतीय संघ २-० ने पिछाडीवर आहे.

त्यामुळे भारताने मालिका तर गमावली आहे. मात्र WTC च्या दृष्टीने मालिकेतील शेवटचा सामना जिंकणं अतिशय महत्वाचं असणार आहे. दरम्यान या सामन्यापूर्वी एक मोठी अपडेट समोर येत आहे. या सामन्यात हर्षित राणाला पदार्पणाची संधी दिली जाऊ शकते.

इंडियन एक्स्प्रेसने दिलेल्या वृत्तानुसार, हर्षित राणा १ नोव्हेंबरपासून सुरु होणाऱ्या तिसऱ्या कसोटी सामन्यात पदार्पण करु शकतो. हर्षितने मंगळवारी अरुण जेटली स्टेडियमवर झालेल्या सामन्यात शानदार कामगिरी केली.

या गोलंदाजीच्या बळावर दिल्लीने १० गडी राखून विजय मिळवला. या सामन्यात गोलंदाजी करताना हर्षितने पहिल्या डावात ५ गडी बाद केले. तर दुसऱ्या डावात गोलंदाजी करताना त्याने ७ गडी बाद केले.

भारतीय संघाचे माजी निवडकर्ते आणि दिल्लीचे प्रशिक्षक सरनदीप सिंग यांनी इंडियन एक्स्प्रेसला दिलेल्या मुलाखतीत म्हटले की, ' तो (हर्षित) कसोटी क्रिकेट खेळण्यासाठी तयार आहे. ऑस्ट्रेलियाला जाण्यापूर्वी त्याने मुंबई कसोटी खेळणं गरजेचं आहे. '

हर्षित राणा काय म्हणाला?

आसामविरुद्धच्या सामन्यानंतर बोलताना राणा म्हणाला की,' टीम मॅनेजमेंटने मला ऑस्ट्रेलिया दौऱ्यावर जाण्यापूर्वी देशांतर्गत क्रिकेट खेळण्यासाठी सांगितलं होतं. मला आनंद आहे की, मी फलंदाजी आणि गोलंदाजीच चांगली कामगिरी केली आहे.' हर्षित राणाला यापूर्वी टी-२० संघातही स्थान दिलं गेलं आहे. मात्र त्याला पदार्पणाची संधी दिली गेली नव्हती.

भारत- न्यूझीलंड तिसऱ्या सामन्यासाठी असा आहे भारतीय संघ:

रोहित शर्मा (कर्णधार), जसप्रीत बुमराह (उपकर्णधार) यशस्वी जयस्वाल, शुभमन गिल, विराट कोहली, केएल राहुल, सरफराज खान, रिषभ पंत (यष्टीरक्षक), ध्रुव जुरेल (यष्टीरक्षक), आर अश्विन, रविंद्र जडेजा, अक्षर पटेल, कुलदीप यादव, मोहम्मद सिराज, आकाश दीप, वाॉशिंग्टन सुंदर, हर्षित राणा