Richa Ghosh : 4 सेंटीमीटरने केला घात! अवघे 6 रन्स शिल्लक असताना हुकलं शतक; Video पाहून तुम्हीही चुकचुकाल

IND W Vs SA W : महिला वनडे वर्ल्डकप २०२५ मधील भारत विरुद्ध दक्षिण आफ्रिका हा सामना रंगला आहे. या सामन्यात प्रथम फलंदाजी करताना भारताच्या संघाने ४९.५ ओव्हर्समध्ये २५१ धावा केल्या. सामन्यात रिचा घोषने जबरदस्त खेळी केली, ती ९४ धावांवर बाद झाली. फक्त ४ सेंटीमीटरने तिचे शतक हुकले. असे असतानाही तिने वर्ल्डकपमध्ये विक्रम प्रस्थापित केला.

दक्षिण आफ्रिकाने टॉस जिंकत भारतीय संघाला प्रथम फलंदाजी करण्यासाठी आमंत्रित केले. सलामीच्या जोडीने अर्धशतकी भागीदारी करत दमदार सुरुवात केली. पण या जोडीनंतर मधल्या फळीतील फलंदाजही लागोपाठ बाद झाले. ८३ धावांवर एकच विकेट पडली होती. पण पुढे अवघ्या १०२ धावांवर भारताचे सहा फलंदाज बाद झाले.

आठव्या क्रमांकावर खेळण्यासाठी रिचा घोष मैदानात उतरली. तिने परिस्थितीनुसार खेळ सुरु ठेवला. तिने ५३ चेंडूत अर्धशतक झळकावले. त्यानंतर तिने चौकार, षटकारांचा मारा करत संघाला २५० धावांच्या पुढे नेले. डावाच्या शेवटच्या ओव्हरमध्ये ३ चेंडू शिल्लक असताना ती ९४ धावांवर बाद झाली. षटकार मारत १०० धावा पूर्ण करण्याचा प्रयत्न करताना ती बाद झाली.

झेल घेतल्यानंतर रिचाने नो-बॉलसाठी अंपायरकडे अपील केले. त्यांनी तो अपील थर्ड अंपायरकडे पाठवला. हाईट ट्रॅकरच्या रिप्लेमध्ये चेंडू चिन्हापेक्षा फक्त ४ सेंटीमीटरने खाली असल्याचे दिसून आले. यामुळे तिला थर्ड अंपायरने बाद घोषित केले. शतक हुकले असतानाही तिने विश्वविक्रम रचला. महिला वनडे क्रिकेटच्या इतिहासात ८ व्या किंवा त्यापेक्षा कमी क्रमांकावर फलंदाजी करताना खेळाडूने केलेली सर्वोच्च धावसंख्या या विक्रमाची नोंद रिचा घोषच्या नावावर झाली आहे.