Virat Kohli Run Out: काय गरज होती? शेवटचे १० मिनिटं शिल्लक असताना, विराट रनआऊट- VIDEO

Virat Kohli Run Out In 3rd Test: विराट कोहली न्यूझीलंडविरुद्धच्या कसोटी मालिकेत आपल्या कारकिर्दीतील ६०० वी इनिंग खेळण्यासाठी मैदानात उतरला होता. ही त्याच्या कसोटी कारकिर्दीतील २०० वी इनिंग होती. या इनिंगमध्ये त्याला धावबाद होऊन माघारी परतावं लागलं आहे.

आउट ऑफ फॉर्म असलेल्या विराटला या सामन्यातही सुर गवसला नव्हता. तो ६ चेंडूत ४ धावा करत तंबूत परतला. पहिल्या दिवसातील शेवटची काही मिनिटं शिल्लक असताना त्याने डाईव्ह मारली, पण मॅट हेनरीच्या अचूक थ्रो मुळे त्याला पॅव्हेलियनची वाट धरावी लागली.

तर झाले असे की, भारतीय संघाची पहिल्या डावातील फलंदाजी सुरू असताना न्यूझीलंडकडून १९ वे षटक टाकण्यासाठी रचिन रविंद्र गोलंदाजीला आला. या षटकातील तिसऱ्या चेंडूवर विराट कोहली स्ट्राइकवर होता.

त्यावेळी विराटने हलक्या हाताने शॉट खेळून १ धाव घेण्याचा प्रयत्न केला. मात्र विराट धाव पूर्ण करणार इतक्यात मॅट हेनरीने चेंडू अडवला आणि एका हाताने डायरेक्ट थ्रो केला. हा चेंडू यष्टीला जाऊन लागला. विराटने डाईव्ह मारली खरी पण, चेंडू आधीच यष्टीला जाऊन लागला होता. त्यामुळे विराटला मान खाली घालून मैदानाबाहेर जावं लागलं.

विराट हा आंतरराष्ट्रीय क्रिकेमधील सर्वात फिट क्रिकेटपटू आहे. मात्र यावेळी त्याचा अंदाज चुकला. तो डाईव्ह मारूनही पोहचू शकला नाही. त्यामुळे त्याला स्वस्तात माघारी परतावं लागलं. दरम्यान विराट कोहली कसोटीत केवळ चौथ्यांदा धावबाद होऊन माघारी परतला आहे.

या सामन्याबद्दल बोलायचं झालं तर, या सामन्यात न्यूझीलंडने नाणेफेक जिंकत प्रथम फलंदाजी करण्याचा निर्णय घेतला. प्रथम फलंदाजी करताना न्यूझीलंडचा डाव २३५ धावांवर आटोपला. न्यूझीलंडकडून फलंदाजी करताना डॅरील मिशेलने सर्वाधिक ८२ धावांची खेळी केली. तर विल यंग ७१ धावांवर परतला. न्यूझीलंडचा संपूर्ण डाव २३५ वर आटोपला.