IND vs AUS, Playing XI: सिडनी कसोटीतून रोहित शर्मा बाहेर? कोणत्या ११ खेळाडूंना मिळणार स्थान?

भारत आणि ऑस्ट्रेलिया यांच्यातील पाचवा कसोटी सिडनीच्या मैदानावर रंगणार आहे. बॉर्डर-गावसकर ट्रॉफीतील ४ कसोटी सामने खेळले गेले आहेत. या मालिकेतील पहिल्या कसोटीत भारतीय संघाने शानदार विजय मिळवला होता.

तर दुसऱ्या सामन्यात भारतीय संघाला पराभवाचा सामना करावा लागला होता. मालिकेतील तिसरा सामना ड्रॉ राहिला, तर मालिकेतील चौथा सामना ऑस्ट्रेलियाने जिंकला. मालिकेत ऑस्ट्रेलियाचा संघ २-१ ने आघाडीवर आहे. दरम्यान शेवटच्या सामन्यासाठी कशी असेल भारतीय संघाची प्लेइंग ११? जाणून घ्या.

सिडनी कसोटी सामना हा भारतीय संघासाठी अतिशय महत्वाचा असणार आहे. मात्र या सामन्यापूर्वी भारतीय संघाला मोठा धक्का बसला आहे. संघातील प्रमुख वेगवान गोलंदाज आकाश दीप दुखापतीमुळे संघातून बाहेर पडला आहे. त्याची जागा भरुन काढण्यासाठी हर्षित राणा किंवा प्रसिद्ध कृष्णाला संधी दिली जाऊ शकते.

रोहित शर्माला बाहेर बसावं लागेल?

मालिकेतील पहिला सामना पर्थच्या मैदानावर पार पडला होता. या सामन्यात रोहित शर्मा खेळू शकला नव्हता. हा सामना भारतीय संघाने जिंकला होता. त्यानंतर मालकेतील पुढील ३ सामन्यांमध्ये रोहित शर्मा खेळताना दिसून आला. या ३ पैकी २ सामने भारतीय संघाने गमावले आहेत. तर १ सामना ड्रॉ राहिला आहे. या तिन्ही सामन्यांमध्ये रोहित शर्मा पूर्णपणे फ्लॉप ठरला.

दरम्यान सिडनी कसोटीच्या १ दिवसाआधी सोशल मीडियावर वेगळीच चर्चा रंगायला सुरुवात झाली आहे. एक फोटो सोशल मीडियावर तुफान व्हायरल होतोय, ज्यात संघातील खेळाडू सराव करण्यासाठी मैदानात उतरल्याचं दिसून येत आहे. मात्र रोहित शर्मा मैदानात सराव करताना दिसून येत नाहीये. यावरुन रोहितला शेवटच्या कसोटीतून वगळलं जाऊ शकतं, अशी चर्चा सुरु आहे.