IPL 2025 Mega Auction: टीम इंडियाला नडणारा हा गोलंदाज लिलावात भाव खाणार! डेल स्टेनची मोठी भविष्यवाणी

Dale Steyn On Marco Jansen: भारत आणि दक्षिण आफ्रिका या दोन्ही संघांमध्ये पार पडलेल्या तिसऱ्या सामन्यात भारतीय संघाने दमदार खेळ करत विजय मिळवला. मात्र दक्षिण आफ्रिकेचा वेगवान गोलंदाज मार्को यानसेन भारतीय गोलंदाजांना चांगलाच नडला.

त्याने या डावात तुफान फटकेबाजी करत अर्धशतकी खेळी केली. या खेळीच्या बळावर त्याने दक्षिण आफ्रिकेला विजयाच्या अगदी जवळ पोहोचवलं. या शानदार कामगिरीनंतर त्याला आयपीएल लिलावात चांगलाच भाव मिळेल, अशी भविष्यवाणी दक्षिण आफ्रिकेचा माजी गोलंदाज डेल स्टेनने केली आहे.

येत्या २४ आणि २५ नोव्हेंबरला सौदी अरेबियातील जेद्दामध्ये आयपीएलचा मेगा लिलाव होणार आहे. या लिलावात मार्को यान्सेनची बेस प्राईज १.२५ कोटी रुपये इतकी असणार आहे आता डेल स्टेनच्या मते त्याच्यावर लिलावात मोठी बोली लागू शकते. स्टेनने आपल्या अकाऊंटवरुन पोस्ट शेअर करत लिहिले की, 'मार्को यान्सेनला १० कोटी रुपये मिळणार? मला तरी हेच वाटतं..'

डेल स्टेन हा दक्षिण आफ्रिकेचा दिग्गज गोलंदाज आहे. त्याच्या मते मार्को यान्सेनला लिलावात मोठी बोली लागू शकते. कारण त्याने आपल्या वेगवान गोलंदाजीसह फलंदाजीतही दमदार कामगिरी करुन दाखवली आहे.

मालिकेतील तिसऱ्या सामन्यात गोलंदाजी करताना त्याने ४ षटकात २८ धावा खर्च करत १ गडी बाद केला. यासह फलंदाजी करताना त्याने १६ चेंडूंचा सामना करत दक्षिण आफ्रिकेसाठी दुसरे सर्वात वेगवान अर्धशतक झळकावले. या डावात त्याने ५१ धावांची खेळी केली. मात्र तो संघाला विजय मिळवून देऊ शकला नाही.

तसेच या सामन्याबद्दल बोलायचं झालं, तर या सामन्यात दक्षिण आफ्रिकेने नाणेफेक जिंकून प्रथम गोलंदाजीचा निर्णय घेतला होता.

प्रथम फलंदाजीसाठी आलेल्या भारतीय संघाने २० षटकअखेर २१९ धावा करता आल्या. भारतीय संघाकडून तिलक वर्माने शतकी खेळी केली. तर अभिषेक शर्माने अर्धशतक झळकावलं. या धावांचा बचाव करताना भारताने ११ धावांनी विजय मिळवला.