IPL 2025: आयपीएलआधी मोठा उलटफेर! राजस्थानचा दिग्गज खेळाडू KKR च्या ताफ्यात

आयपीएल २०२५ स्पर्धेपूर्वी सर्व संघांमध्ये मोठे बदल पाहायला मिळणार आहे. कारण या स्पर्धेपूर्वी मेगा ऑक्शनचा थरार रंगणार आहे. त्यामुळे आपल्या आवडत्या संघातील खेळाडू दुसऱ्या संघाकडून खेळताना दिसून येऊ शकतात.

तर दुसऱ्या संघातील खेळाडू आपल्या आवडत्या संघातून खेळताना दिसून येऊ शकतात. दरम्यान संघातील खेळाडूंमध्ये बदल होण्यापूर्वी कोचिंग स्टाफमध्ये बदल व्हायला सुरुवात झाली आहे. राजस्थान रॉयल्स संघातील दिग्गज खेळाडू आगामी आयपीएल स्पर्धेसाठी कोलकाता नाईट रायडर्स संघात जाणार असल्याची चर्चा सुरु आहे.

माध्यमातील वृत्तानुसार राजस्थान रॉयल्स संघातील दिग्गज खेळाडू कोलकाता नाईट रायडर्सच्या ताफ्यात जाणार असल्याचं म्हटलं जात आहे. कुमार संगकाराने २०२१ पासून राजस्थान रॉयल्स संघासाठी डायरेक्टर ऑफ क्रिकेटची भूमिका बजावली आहे.

मात्र आता त्यांनी या फ्रेंचायझींची साथ सोडण्याचा विचार केला आहे. त्यामुळे इतर फ्रेंचायझी त्याला संपर्क करत आहे. ज्यात केकेआरचाही समावेश असल्याचं म्हटलं जात आहे. मात्र याबाबत कुठलीही अधिकृत माहिती समोर आलेली नाही. येत्या काही दिवसात, याबाबत निर्णय घेतला जाणार आहे. जर कुमार संगकाराने केकेआरमध्ये प्रवेश केला. तर त्याला मेंटॉरची भूमिका दिली जाऊ शकते.

गंभीरने सोडली केकेआरची साथ

गौतम गंभीरने आयपीएल २०२४ स्पर्धेत कोलकाता नाईट रायडर्स संघासाठी मोलाची भूमिका बजावली होती. मात्र गंभीरची भारतीय संघाच्या मुख्य प्रशिक्षकपदी निवड करण्यात आली आहे. त्यामुळे त्याला केकेआरची साथ सोडावी लागली आहे. यासह अभिषेक नायरने देखील केकेआरची साथ सोडली आहे.

केकेआरने आयपीएल २०२४ स्पर्धेत जेतेपदावर नाव कोरलं होतं. फायनलमध्ये या संघाने हैदराबादला पराभूत करत आयपीएलची ट्रॉफी उंचावली होती. या विजयाचं श्रेय गौतम गंभीरला देखील दिलं गेलं होतं.

भारतीय संघाचे माजी क्रिकेटपटू राहुल द्रविड राजस्थान रॉयल्स संघात एन्ट्री करणार असल्याचं म्हटलं जात आहे. राहुल द्रविड यांची राजस्थान रॉयल्स संघाच्या मुख्य प्रशिक्षकपदी निवड करण्यात आली आहे. लवकरच याबाबत अधिकृत घोषणा केली जाऊ शकते.