Amol Muzumdar: भारतीय महिला क्रिकेट संघाला प्रशिक्षक म्हणून मिळाला 'दुसरा सचिन'; पदार्पणातच कुटल्या होत्या २६० धावा

Amol Mujumdar Latest News:

बीसीसीआयने भारताच्या महिला क्रिकेट संघाच्या नव्या मुख्य प्रशिक्षकाची घोषणा केली आहे. भारतीय क्रिकेट महिला संघाला अमोल मुजुमदारच्या रुपाने नवा मुख्य प्रशिक्षक मिळाला आहे. सुलक्षणा नाईक, अशोक मल्होत्रा आणि जतिन परांजपे यांच्या क्रिकेट सल्लागार समितीने महिलांच्या क्रिकेट संघाच्या मुख्य प्रशिक्षकपदी अमोल मुजुमदारची निवड केली आहे.(Latest Marathi News)

टीम इंडियाच्या मुख्य प्रशिक्षकपदासाठी तुषार अरोठे , जॉन लुईस आणि अमोल मुजुमदार यांच्या नावाची चर्चा होती. मात्र, अखेर बीसीसीआयने अमोल मुजुमदारच्या नावावर शिक्कामोर्तब केला. (सामच्या बातम्या Whatsapp वर मिळवण्यासाठी आत्ताच या लिंकवर क्लिक करा)

रणजी करंडक स्पर्धेत अमोल मुजुमदारने २१ वर्षांच्या करिअरमध्ये १७१ सामन्यात ३० शतकासहित ११,००० धावा केल्या आहेत. तर मुजुमदारने १०० हून अधिक ए मॅचमध्ये तर १४ टी-२० सामने खेळले आहेत.

मुंबईकडून खेळताना संघाने रणजी चषक जिंकण्याचा मान देखील पटकावला आहे. मुजुमदारने आसाम आणि आंध्रप्रदेशचंही नेतृत्व केलं आहे.

मुजुमदारने 1993-94 मध्ये रणजी करंडक स्पर्धेतून हरियाणाविरोधातील पहिल्या सामन्यात धमाकेदार द्विशतकी खेळी केली होती. त्याने या सामन्यात २६० धावा कुटल्या होत्या. दमदार कामगिरीमुळे अमोल हा 'दुसरा सचिन' म्हणून ओळखला जाऊ लागला.

भारतीय महिला संघाच्या मुख्य प्रशिक्षकपदी निवड झाल्यानंतर अमोल मुजुमदार म्हणाला, ' माझी भारतीय महिला क्रिकेट टीमच्या (वरिष्ठ महिला) मुख्य प्रशिक्षकपदी निवड झाल्यामुळे अभिमान वाटतोय. बीसीसीआयने माझ्यावर विश्वास ठेवल्याबद्दल सीएसी आणि बीसीसीआयचे आभार मानतो'.

'माझ्यावर मोठी जबाबदारी सोपविण्यात आली आहे. मी आता टीम इंडियातील प्रभावशाली महिला खेळाडूंना मार्गदर्शन करण्यासाठी उत्सुक आहे. पुढील दोन वर्ष हे विश्वचषकामुळे महत्वाचे आहेत, असेही अमोल मुजुमदार पुढे म्हणाला.