अभिषेक शर्मा नावाचं वादळ! ठोकलं सर्वात वेगवान शतक; सोशल मीडियावर शर्माच्या सेलिब्रेशनची चर्चा

भारत आणि अफगाणिस्तान यांच्यातील तिसऱ्या टी20 सामन्यात भारतीय संघाचा सलामीवीर अभिषेक शर्मा याने वादळी फलंदाजी करत क्रिकेट जगतात नवा इतिहास रचला. दिल्लीच्या अरुण जेटली स्टेडियमवर खेळल्या गेलेल्या या सामन्यात अभिषेक शर्माने फक्त 30 चेंडूंमध्ये शतक पूर्ण करत आंतरराष्ट्रीय टी20 क्रिकेटमधील अनेक मोठे जागतिक विक्रम मोडीत काढला. त्यानंतर अभिषेक शर्मानं अनोखं सेलिब्रेशन केलं. त्याच्या सेलिब्रेशनची सोशल मीडियावर चर्चा होतेय.

अभिषेक शर्माने 9 चौकार आणि 10 गगनचुंबी षटकाराच्या जोरावर शतक पूर्ण केलं. यावेळी त्याची स्ट्राईक रेट तब्बल 333.33 इतका होता. अभिषेक शर्माचे हे आंतरराष्ट्रीय टी20 कारकिर्दीतील तिसरे शतक ठरले आहे. या शतकासह तो कसोटी खेळणाऱ्या देशांपैकी आंतरराष्ट्रीय टी20 मध्ये सर्वात वेगवान शतक ठोकणारा पहिला फलंदाज बनलाय.

आंतरराष्ट्रीय टी20 क्रिकेटच्या इतिहासातील हे तिसरे सर्वात वेगवान शतक आहे. अभिषेकनं रोहित शर्माचा 9 वर्षांपूर्वीचा विक्रम मोडलाय. रोहित शर्माने 2017 मध्ये इंदूर येथे श्रीलंकेविरुद्ध 35 चेंडूंत शतक झळकावले होते, ज्याचा रेकॉर्ड आता अभिषेकने आपल्या नावावर केला आहे. शतकानंतरही त्याने आपली आक्रमक फलंदाजी सुरूच ठेवली. अभिषेक 34 चेंडूंत 108 धावा करून बाद झाला. या ऐतिहासिक डावात त्याने एकूण 9 चौकार आणि 11 षटकार मारले. अफगाणिस्तानचा फिरकीपटू राशिद खानने त्याची विकेट काढली.