Coal mine explosion : कोळसा खाणीत भीषण स्फोट, ७ कामगार जागीच ठार, घटनेचा थरारक VIDEO

पश्चिम बंगालच्या बीरभूम जिल्ह्यात कोळसा खाणीत भीषण स्फोट झाला. या स्फोटात ७ कामगारांचा मृत्यू झाला आहे. तर अनेकजण जखमी झाले आहेत. जखमींना उपचारासाठी रुग्णालयात दाखल करण्यात आलं आहे. काहींची प्रकृती चिंताजनक असल्याचं कळतंय. स्फोटाची माहिती मिळताच स्थानिक पोलिसांसह प्रशासकीय अधिकाऱ्यांनी घटनास्थळी धाव घेतली आहे. कामगारांना सुखरूप बाहेर काढण्यात येत आहे.

लोकपूर पोलीस स्थानकांतर्गत येणाऱ्या कोळसा खाणीत हा स्फोट झाला असून यामागील कारण अद्याप स्पष्ट झालेले नाही. मिळालेल्या माहितीनुसार, बीरभूम जिल्ह्यात कोळसा खाण आहे. गंगारामचक मायनिंग प्रायव्हेट लिमिटेड कोलियरी (जीएमपीएल) असे या खाणीचे नाव आहे. या खाणीत परिसरातील शेकडो कामगार काम करतात. सोमवारी सकाळी देखील अनेक कामगार कामावर आले होते.

यावेळी कोळसा क्रशिंग दरम्यान खाणीत भीषण स्फोट झाला. या स्फोटाची तीव्रता इतकी भीषण होती की, आसपासचा परिसर हादरला. जवळपास दोन ते तीन किलोमीटर स्फोटाचा आवाज ऐकू आला. या स्फोटात ५ कामगार जागीच ठार झाले. तर दोन कामगारांचा रुग्णालयात घेऊन जाताना मृत्यू झाला. स्फोटात अनेक कामगार देखील जखमीही झाले आहेत. त्यांच्यावर रुग्णालयात उपचार सुरु आहे.

कोळसा क्रशिंगसाठी कोळसा खाणीत ब्लास्टिंग करत असताना अनावधानाने हा स्फोट झाल्याची प्राथामिक माहिती आहे. स्फोट होताच अनेक कर्मचारी तसेच कामगारांनी खाणीतून पळ काढला आहे. सध्या स्थानिक पोलीस घटनास्थळी पोहोचले असून उर्वरित कामगारांना सुखरूप बाहेर काढण्यात येत आहे. याशिवाय भाजपचे स्थानिक आमदारही घटनास्थळी दाखल झाले आहेत. सध्या बचाव आणि मदतकार्य सुरू आहे. पोलीस मृतांच्या कुटुंबीयांची माहिती गोळा करून त्यांच्याशी संपर्क साधत आहेत.