रेकॉर्डब्रेक मतदान! पश्चिम बंगालमध्ये ९० टक्के व्होटिंग; सत्ता बदलणार की ममता बॅनर्जी पुन्हा येणार?

West Bengal Election 2026 Voting : पश्चिम बंगालमध्ये विधानसभा निवडणुकीच्या पहिल्या टप्प्यात रेकॉर्डब्रेक मतदान झाले. आज सायंकाळी ५ वाजेपर्यंत १५२ विधानसभा मतदारसंघात तब्बल 89.93% मतदान झाल्याची माहिती आयोगाकडून देण्यात आली आहे. या विधानसभा मतदारसंघात २०२१ मध्ये ८१.१६ टक्के मतदान झाले होते. पश्चिम बंगालमधील मतदानाचे आतापर्यंतचे सर्व विक्रम मोडीत निघाले आहेत. त्यामुळे ममता बॅनर्जी पुन्हा सत्तेत येणार की भाजप डाव साधणार? याची चर्चा सोशल मीडियावर सुरू झाली आहे.

कोणत्या जिल्ह्यात किती मतदान झालं?

दक्षिण दिनाजपूर 93.12% (सर्वात जास्त)

कूचबिहार 92.07%

बीरभूम 91.55%

मुर्शिदाबाद 91.36 %

जलपाईगुडी 91.20%

पश्चिम मेदिनीपूर 90.70%

झारग्राम 90.589%

उत्तर बँकुरा 90.583%

मालदा 89.56%

अलीपुरद्वार 88.74%

पूर्व मेदिनीपूर 88.55%

पुरुलिया 87.35%

पश्चिम वर्धमान 86.89%

दार्जिलिंग 86.49%

कालिम्पाँग 81.98% (सर्वात कमी)

पश्चिम बंगाल विधानसभा निवडणुकीसाठी पहिल्या टप्प्याचे मतदान पार पडत आहे. गुरूवारी १६ जिल्ह्यातील १५२ विधानसभा जागांसाठी मतदान झाले. १४७८ उमेदवार निवडणुकीत उतरले आहेत. भाजप आणि ममता बॅनर्जी यांच्यामध्ये थेट टक्कर असून ४४ हजार मतदान केंद्रावर मतदान पार पडले. ३ कोटींपेक्षा जास्त मतदारांनी हक्क बजावला आहे.

पश्चिम बंगालमध्ये भाजपचे सरकार येणार: अमित शाह

केंद्रीय गृहमंत्री अमित शाह यांनी बंगालमधील एका निवडणूक सभेला संबोधित करताना सांगितले, "आज मतदानाचा पहिला टप्पा जवळपास पूर्ण झाला आहे. ५ तारखेला ममता बॅनर्जी यांचा पराभव होईल. बंगालमध्ये पूर्ण बहुमतासह भाजपचे सरकार स्थापन होणार आहे. बंगालला घुसखोरांपासून मुक्त करण्यासाठी तुम्हा सर्वांनी कमळाचे बटण दाबलेच पाहिजे."