Weather Update: हवामान बिघडलं! गडगडाटी वादळ, पाऊस अन् बर्फवृष्टी; महाराष्ट्रासह अनेक राज्यांना IMDकडून अलर्ट

नागरिकांनो, कृपया लक्ष द्या! हवामानात अचानक बदल होण्याची शकता आहे. भारतीय हवामान विभाग (IMD) नुसार मध्य हिंदी महासागर आणि बंगालच्या उपसागर भागावरील हवेवर चक्रीवादळाचा परिणाम झाला आहे. यामुळे सकाळपासून कमी दाबाचे क्षेत्र तयार झाले आहे. कमी दाबाचा पट्टा पश्चिम-वायव्येकडे सरकणार आहे. १८ फेब्रुवारीच्या सुमारास बंगालच्या उपसागर आणि हिंदी महासागरावर मजबूत होईल असा अंदाज आहे.

याव्यतिरिक्त, अफगाणिस्तानवर एक पश्चिमी विक्षोभ सक्रिय झाले आहे. या हवामानातील या बदलामुळे येत्या काही दिवसांत अनेक भागात पाऊस, हिमवर्षाव आणि गडगडाटी वादळे येण्याची शक्यता आहे. उत्तर भारतात हवामान बदलण्याची शक्यता आहे. १८ फेब्रुवारी रोजी हिमाचल प्रदेशात आणि १८-१९ फेब्रुवारी रोजी उत्तराखंडमध्ये तुरळक पाऊस किंवा हिमवृष्टी होण्याची शक्यता आहे. १७ आणि १८ फेब्रुवारी रोजी पंजाब, हरियाणा, चंदीगड आणि राजस्थानमध्ये काही ठिकाणी गडगडाटी वादळ आणि मुसळधार पाऊस पडण्याची शक्यता आहे. तसेच या काळात ३०-४० किमी/ताशी वेगाने जोरदार वारे वाहण्याची शक्यता आहे.

यासह १८ फेब्रुवारी रोजी मध्य प्रदेशात वादळ येणार असल्याचा अंदाज हवामान विभागाने वर्तवलाय. १६ ते १८ फेब्रुवारी दरम्यान अंदमान आणि निकोबार बेटांवर पाऊस, वादळ आणि वादळी वारे वाहणार आहे. २१-२२ फेब्रुवारी रोजी दक्षिण तामिळनाडू, केरळ आणि माहे येथील काही ठिकाणी मुसळधार पाऊस होईल असा इशाराही देण्यात आला आहे.

आयएमडीचा अलर्ट

तापमानाच्या ट्रेंडकडे पाहता, पुढील दोन दिवसांत वायव्य भारतातील किमान तापमानात २-३ अंश सेल्सिअसने वाढ होण्याची शक्यता आहे. त्यानंतर पुढील दोन दिवसांतही अशीच घट होईल, कोणताही महत्त्वपूर्ण बदल होणार नसल्याचं भारतीय हवामान खात्याने म्हटलंय.

मध्य भारतात पुढील तीन दिवसांत किमान तापमानात २-३ अंशांनी वाढ होईल असा अंदाज आहे. गुजरातमध्ये पुढील दोन दिवसांत तापमान अपरिवर्तित राहील, नंतर तीन दिवसांत वाढेल आणि त्यानंतर स्थिर राहील. पूर्व आणि ईशान्य भारतात पुढील तीन दिवसांत तापमान अपरिवर्तित राहील, नंतर चार दिवसांत २-३ अंशांनी वाढणार.