Vande Bharat Express Accident : वंदे भारत एक्स्प्रेसला सलग दुसऱ्या दिवशी अपघात, मोठा अनर्थ टळला, पण...

Vande Bharat Express Accident News : गुजरातच्या आणंद रेल्वे स्थानकाजवळ वंदे भारत एक्स्प्रेसला शुक्रवारी अपघात झाला. एका गायीला वंदे भारत एक्स्प्रेसची धडक लागली. या धडकेमुळं ट्रेनच्या पुढच्या भागाचं नुकसान झालं.

वंदे भारत एक्स्प्रेसला (Vande Bharat Express) दोन दिवसांत दुसऱ्यांदा अपघात झाला. दुर्घटना घडली त्यावेळी पायलट सतर्क असल्याने अनर्थ टळला. पायलटनं तात्काळ हॉर्न दिला आणि ब्रेक लावला. ही घटना गांधीनगर-मुंबई या दरम्यान घडला. (Latest Marathi News)

आदल्या दिवशीच म्हणजे गुरुवारी नव्यानेच सुरू झालेल्या सेमी-हायस्पीड वंदे भारत एक्स्प्रेसने चार म्हशींना धडक दिली होती. (Accident) त्यात ट्रेनच्या पुढच्या भागाने मोठे नुकसान झाले होते. तब्बल २० मिनिटांनंतर ट्रेन मार्गस्थ झाली होती. त्यानंतर रात्री उशिरापर्यंत कोचिंग केअर सेंटरमध्ये दुरुस्तीनंतर ट्रेन पुन्हा गुजरातसाठी रवाना झाली होती.

रेल्वे अधिकाऱ्यांच्या माहितीनुसार, दुर्घटनेत ट्रेनचं किरकोळ नुकसान झालं आहे. शुक्रवारी दुपारी पावणेचारच्या सुमारास मुंबईपासून जवळपास ४३२ किलोमीटरवर आणंद रेल्वे स्थानकाजवळ ही घटना घडली. पश्चिम रेल्वेचे मुख्य जनसंपर्क अधिकारी सुमित ठाकूर यांनी या घटनेला दुजोरा दिला आहे, असे वृत्त एका मीडिया हाउसने दिले आहे.

ट्रेनच्या पुढील भागाचे नुकसान झाले आहे. सर्व प्रवासी सुरक्षित आहेत. मागील ३० सप्टेंबरलाच पंतप्रधान नरेंद्र मोदी यांनी सेमी हायस्पीड ट्रेनला हिरवा झेंडा दाखवला होता. ६ दिवसांनंतरच या ट्रेनला सलग दुसऱ्यांदा अपघात झाला. सुदैवाने दोन्ही दुर्घटनांमध्ये प्रवाशांना कोणतीही दुखापत झाली नाही.