Accident News : फ्लायओव्हरवर भीषण अपघात! कारची दुचाकीला जोरदार धडक; ४ मित्रांचा दुर्दैवी मृत्यू

उत्तराखंडमधील हल्द्वानीमध्ये शनिवारी रात्री भीषण अपघातात घडला. या अपघातात चार मित्रांचा दुर्दैवी मृत्यू झाला. तीनपानी-गौलापार बायपास फ्लायओव्हरवर भरधाव वेगाने धावणाऱ्या स्कॉर्पिओ कारने दुचाकीवरून जाणाऱ्या चार मित्रांना जोरदार धडक दिली. या अपघातात तिघांचा रुग्णालयात नेत असताना मृत्यू झाला, तर एकाचा उपचारादरम्यान मृत्यू झाला. याप्रकरणी पोलीस पुढील तपास करत आहेत.

पोलिसांनी दिलेल्या माहितीनुसार, शनिवारी चारही मित्र एकत्र भेटण्याचा प्लॅन ठरला होता. ठरल्यानुसार चौघेही भेटले आणि दुचाकीवरून जात असतानाच काळाने घाला घातला. रात्री सुमारे १० वाजण्याच्या सुमारास तीनपानी-गौलापार बायपास फ्लायओव्हरवर भरधाव वेगाने धावणाऱ्या स्कॉर्पिओ कारने दुचाकीवरून येणाऱ्या ४ मित्रांना जोरदार धडक दिली. या धडकेत चौघेही रक्ताच्या थारोळ्यात पडले. फ्लायओव्हरवर अपघात झाल्याची माहिती मिळताच पोलीस घटनास्थळी दाखल झाले. घटनास्थळी पोहोचलेल्या पोलिसांना राहुल राजपूत (१७), शिवम (२५), अंशु आर्य (२०) आणि आदित्य टम्टा (१८) हे गंभीर जखमी अवस्थेत आढळले. त्यांच्या जवळच एक दुचाकी पडलेली होती.

चारही जखमींना तातडीने डॉ. सुशीला तिवारी रुग्णालयात दाखल करण्यात आले. मात्र राहुल, शिवम आणि अंशु यांना डॉक्टरांनी मृत घोषित केले. गंभीर जखमी असलेल्या आदित्यचा मध्यरात्रीनंतर उपचारादरम्यान मृत्यू झाला. या घटनेमुळे चारही कुटुंबांवर दुःखाचा डोंगर कोसळला आहे. अपघाताची तीव्रता इतकी भीषण होती की स्कॉर्पिओचे चाकही कारपासून वेगळे झाले. पोलिसांनी स्कॉर्पिओमधील दोन जणांना ताब्यात घेऊन चौकशी सुरू केली आहे.

दरम्यान, चारही मित्र घरातून एकमेकांना भेटण्यासाठी बाहेर पडले होते. मात्र ही त्यांची शेवटची भेट ठरेल, याची कुणालाही कल्पना नव्हती. शिवमने घरातून निघताना आईला "एका तासात परत येतो" असे सांगितले होते. मात्र काही वेळातच त्याच्या मृत्यूची बातमी घरी पोहोचली. या हृदयद्रावक घटनेमुळे संपूर्ण परिसरात शोककळा पसरली असून अपघाताचे नेमके कारण शोधण्यासाठी पोलिसांकडून सखोल तपास सुरू आहे.