Rain Alert : उत्तर प्रदेशला अवकाळी पावसाचा तडाखा! वीज कोसळल्याने २४ जणांचा मृत्यू

उत्तर भारतातील वातावरणात गेल्या काही दिवसांपासून मोठे बदल पाहायला मिळत असून, उत्तर प्रदेश आणि बिहार या राज्यांमध्ये मुसळधार पाऊस, वादळ आणि विजांच्या कडकडाटामुळे मोठ्या प्रमाणावर जीवित व मालमत्तेचे नुकसान झाले आहे. या नैसर्गिक आपत्तीमुळे नागरिकांमध्ये भीतीचे वातावरण निर्माण झाले आहे. मुसळधार पावसात आतापर्यंत २४ नागरिकांचा मृत्यू झाला असून १६ जनावरे दगावली आहेत. मुख्यमंत्र्यांनी याची भरपाई देण्याचे आदेश दिले आहेत.

उत्तर प्रदेशमध्ये गेल्या दोन दिवसांत झालेल्या अवकाळी पावसामुळे परिस्थिती गंभीर बनली आहे. जोरदार वारे, पावसाच्या सरी आणि विजांच्या कडकडाटामुळे २४ जणांचा दुर्दैवी मृत्यू झाला आहे, तर १५ जण जखमी झाले आहेत. याशिवाय १६ जनावरे दगावल्याची माहिती प्रशासनाने दिली आहे. अनेक ठिकाणी झाडे पडली, वीजपुरवठा खंडित झाला आणि घरांचे नुकसान झाले आहे.

या पार्श्वभूमीवर मुख्यमंत्री योगी आदित्यनाथ यांनी मृतांच्या कुटुंबीयांप्रति शोक व्यक्त करत प्रशासनाला तातडीने मदतकार्य सुरू करण्याचे आदेश दिले आहेत. जखमींना उत्तम वैद्यकीय उपचार मिळावेत यासाठी विशेष निर्देश देण्यात आले आहेत. तसेच, पावसामुळे झालेल्या नुकसानाची भरपाई २४ तासांच्या आत देण्याचे आदेश मुख्यमंत्र्यांनी दिले आहेत.

दरम्यान, बिहारमध्येही बुधवारी संध्याकाळपासून गुरुवारी सकाळपर्यंत झालेल्या वादळ आणि मुसळधार पावसामुळे मोठा विध्वंस झाला आहे. यामध्ये किमान ९ जणांचा मृत्यू झाला असून, हे सर्व वेगवेगळ्या जिल्ह्यांतील रहिवासी होते. पाटणा आणि बेतिया जिल्ह्यांमध्ये मिळून चार जणांचा मृत्यू झाला आहे. जहानाबादमध्ये एका घराची बाल्कनी कोसळल्याने चार जण जखमी झाले, तर बक्सरमध्ये ई-रिक्षावर झाड कोसळल्याने सहा जण जखमी झाले आहेत.

भोजपूर जिल्ह्यातील महुली येथे जोरदार वादळामुळे तरंगता पूल तुटून तीन भागांमध्ये विभागला गेला. सुपौलमध्ये वीज पडल्याने नारळाच्या झाडाला आग लागल्याची घटना घडली. या घटनांमुळे प्रशासन अलर्टवर असून, नागरिकांनी सुरक्षित ठिकाणी राहण्याचे आवाहन करण्यात आले आहे. हवामान खात्याने पुढील काही दिवसांमध्येही अशाच प्रकारच्या हवामानाची शक्यता व्यक्त केली असून, नागरिकांनी खबरदारी घेणे अत्यंत गरजेचे आहे.