माजी मुख्यमंत्र्यांसह ४४ नेत्यांना मिळणार बुलेटप्रूफ जॅकेट्स; सरकारचा मोठा निर्णय, काय आहे कारण?

उत्तर प्रदेशात आगामी विधानसभा निवडणुकांच्या पार्श्वभूमीवर, योगी सरकारने मोठा निर्णय घेतलाय. एरव्ही सुरक्षा कर्मचाऱ्यांना बुलेटप्रूफ जॅकेट दिले जातात. मात्र उत्तर प्रदेश सरकारने आता थेट नेत्यांचा बुलेटप्रूफ जॅकेट देण्याचा निर्णय घेतलाय. राज्य सरकारनं असा निर्णय का घेतला हे जाणून घेऊ.

राजकीय नेत्यांच्या सुरक्षेसाठी राज्य सरकारनं घेतलाय. सुरक्षेचा आढावा आणि गुप्तचर विभागाकडून मिळालेल्या माहितीच्या आधारे, सरकारने राज्यातील ४४ प्रमुख नेत्यांना हे जॅकेट दिलं जाणार आहे. यात माजी मुख्यमंत्री मायावती आणि अखिलेश यादव यांचाही समावेश आहे.

सूत्रांनी दिलेल्या माहितीनुसार, सुरक्षा मुख्यालयाकडून सुमारे १० लाख रुपये किमतीच्या विशेष बुलेटप्रूफ जॅकेट्सची खरेदी करण्याची प्रक्रिया पूर्ण झालीय. 'Y' आणि 'Z+' सुरक्षा कवच असलेल्या नेत्यांमध्ये विविध राजकीय पक्षांतील नेत्यांचा तसेच मंत्र्यांचा समावेश आहे. पक्षीय राजकारणाच्या पलीकडे जाऊन, संभाव्य धोक्यांमुळे नेते आणि मंत्र्यांची सुरक्षा वाढवण्याचा निर्णय घेण्यात आलाय.

सुरक्षेच्या गरजा लक्षात घेऊन योगी सरकारमधील ११ मंत्र्यांना हे जॅकेट्स देण्याचा निर्णय घेण्यात आलाय. यामध्ये संजय निषाद आणि नंद गोपाल गुप्ता 'नंदी' यांसारख्या प्रमुख नेत्यांचाही समावेश आहे. माजी मुख्यमंत्री मायावती आणि अखिलेश यादव यांसारख्या विरोधी पक्षांतील प्रमुख नेत्यांव्यतिरिक्त, संगीत सोम आणि सुरेश राणा यांसारख्या नेत्यांचाही या सुरक्षा कवचामध्ये समावेश करण्यात आला आहे. 'वाय' (Y) ते 'झेड-प्लस' (Z-plus) श्रेणीतील सुरक्षा कवच असलेल्या निवडक आमदारांना आणि नेत्यांना ही विशेष बुलेटप्रूफ जॅकेट्स पुरवली जात आहेत.

रॅली आणि रोडशोजच्या पार्श्वभूमीवर सुरक्षा व्यवस्था कडक

राज्यात पुढील वर्षी विधानसभा निवडणुका होणार आहेत. त्यापूर्वी राजकीय नेत्यांकडून जाहीर सभा व रॅलींचे आयोजन केले जाण्याची शक्यता आहे. अशा कार्यक्रमांच्या वेळी सहसा मोठ्या संख्येने जनसमुदाय जमतो. राज्य पोलीस आणि गुप्तचर यंत्रणांकडून मिळालेल्या माहितीच्या आधारे, कोणत्याही अनुचित घटनेची किंवा हल्ल्याची शक्यता टाळण्यासाठी योगी सरकारने ही खबरदारीची उपाययोजना केली आहे.