Shocking: फुगा फुगवताना फुटला, श्वसननलिकेत तुकडा अडकला; १३ वर्षांच्या मुलीचा तडफडून मृत्यू

Summary -

• बुलंदशहरमध्ये १३ वर्षांच्या मुलीचा फुगा फुगवताना मृत्यू

• फुग्याचे तुकडे श्वसननलिकेत अडकल्यामुळे गुदमरून मृत्यू झाला

• भावाचा वाढदिवस असल्याने ती त्याला फुगा फुगवून देत होती

• या घनटेमुळे कुटुंबीयांना मोठा धक्का बसला

फुगा फुगवताना फुटला आणि त्याचे तुकडे श्वसननलिकेत अडकून एका १३ वर्षांच्या मुलीचा दुर्दैवी मृत्यू झाला. ही घटना उत्तर प्रदेच्या बुलंदशहराच्या पहासू भागातील दीघी गावामध्ये घडली. ३ वर्षांच्या भावाच्या वाढदिवसाच्या सेलिब्रेशनची तयारी करत असताना ही घटना घडली. मुलीच्या मृत्यूमुळे कुटुंबीयांना मोठा धक्का बसला. या घटनेमुळे हळहळ व्यक्त केली जात आहे.

दिघी गावामध्ये राहणारे अशोक कुमार यांच्या ३ वर्षांच्या मुलाचा वाढदिवस होता. त्यांची १३ वर्षांची मुलगी कुमकुमने भावाचा वाढदिवस असल्याने त्याच्यासाठी फुगा घेऊन आली होती. कुमकुम फुगा फुगवत होती. तेवढ्यात फुगा फुटला आणि या फुग्याचे तुकडे कुमकुमच्या घश्यात गेले. काही तुकडे कुमकुमच्या श्वननलिकेत अडकले.

फुग्याचे तुकडे श्वसननलिकेत अडकल्यामुळे कुमकुमचा श्वास गुदमरला. ती तडफडू लागली. कुटंबीयांनी तिला तात्काळ रुग्णालयात नेले पण डॉक्टरांनी तिला मृत घोषीत केले. श्वसननलिकेत अडकलेले फुग्याचे तुकडे काढण्यापूर्वीच तिने प्राण सोडले असल्याचे डॉक्टरांनी सांगितले. अशोक यांची मुलगी कुमकुम ही चार भावंडांमध्ये सर्वात मोठी होती. ती सर्व मुलांची काळजी घ्यायची आणि सर्वांवर प्रेम करायची. तिच्या मृत्यूमुळे कुटुंबीयांना मोठा मानसिक धक्का बसला.

कुमकुमच्या वडिलांनी सांगितले की, माझ्या ३ वर्षांच्या मुलाचा वाढदिवस होता. कुमकुमने त्याच्यासाठी दुकानातून फुगा विकत आणला. आपल्या भावाला खूश करण्यासाठी ती प्रयत्न करत होती. घरी आल्यानंतर ती फुगा फुगवताना ही घटना घडली. याप्रकरणी अद्याप पोलिसात तक्रार करण्यात आली नाही. पण या घटनेनंतर पालिकांनी लहान मुलांना फुगे फुगवायला देताना काळजी घ्यावी असे आवाहन डॉक्टरांनी केले आहे.